Politikki

IA illoqarfeeqqani nuannarineqarluartoq

Isumasiuinermi taaguunneqarluarnissamik siulittuutit IA-p nuna tamakkerlugu qineqqusaarneranik patsiseqartut, partiip siulittaasua, Sara Olsvig, Qaarsuarsunniit oqarasuaatikkut oqarpoq.

Sara Olsvig og IA er endegyldigt klar til valget den 28. november.

Allattoq Niels Krogh Søndergaard, Jaaku Lyberth

novembarip 19-at 2014 15:15

Epinionip KNR sinnerlugu qinersisartunik isumasiuinerani Inuit Ataqatigiit qinersinermi 36,9 procentinik ajugaassasoq siulittuutigineqarpoq.

- Pingaartinnikuuarput nunarput angalassallugu aamma sumiiffippassuit tikippagut. Tassani nuannaarutigisarpara qinersisartut tikillugit, oqaloqatigalugit, kiinnerfigalugit, suleqatiginnikkusussusermillu apussiffigissalugit, Sara Olsvig oqarpoq.

Aamma atuaruk IA partiit anginersarilissavaat

Partiillu siulittaasuata nalunngereerpaa isumasiuineruinnaasoq.

- Inuit Ataqatigiit partiit tamakkerlugit suleqatiginissaannut piareersimavugut aamma qinersinissap inernissaata takutikkumaarpaa suleqatigiinnissaq timitalersorneqassanersut, kikkut sutigullu suleqatigiinnissamut isumaqatigiissinnaanersut, Sara Olsvig oqarpoq.

Aamma atuaruk Qinersisartut amerlanersaasa aningaasaqarneq pingaarnerpaatikkaat

Isumasiuinermi ukioqatigiiaat assigiinngitsut IA toqqarpaat, amerlanerilli 35-35-inik ukioqarlutik.

Epinionip isumasiuinera pillugu paasissutissat

Isumasiuineq Nunatsinni innuttaasut 731-t nalaatsornerinnakkut toqqakkat apersorneqarnerinik toqqammaveqarpoq.
Paasissutissanik katersuineq piffissami novembarip arfernanit 17-ianut ingerlanneqarpoq. Apersuisut marluinnik oqaaseqartuupput apersorneqartullu kalaallisut danskisulluunniit akissuteqarnissaminnut periarfissinneqarlutik. Apersorneqartut 87 %-ii kalaallisut akissuteqarput 13 %-illu danskisut akillutik.
Oqarasuaatit normui atorneqartut TelePostimit pissarsiarineqarput, tassaallutillu oqarasuaatit nalinginnaasut, angallattakkat aammalu Tusassillit normui.
Kisitsisitigut paasissutissat nangaanartoqassusiat annerpaamik +/- 3,6 procentiuvoq.