ISUMASIUINEQ Qinersisartut amerlanersaasa aningaasaqarneq pingaarnerpaatikkaat
Epinionip KNR aamma Danmarkip Radioa sinnerlugit qinersisartut isumaannik misissuinerata tamanna ersersippaa.
Qinersisartut 15 procentiisa missaat nunatta aningaasaqarnera pingaarnerpaatillugu partiimik politikerimilluunniit qinersiniarlutik oqaatigaat.
Aamma atuaruk IA partiit anginersarilissavaat
Qinersisartullu 10 procentiisa suliffissaaleqineq suliffeqarnerlu pingaarnerpaatillugit sulissuteqarfigineqarnissaat tunngavigalugu qinersiniarput 7 procentillu ilinniartitaanerup pingaarnerpaatut sulissuteqarfiginissaa tunngavigalugu qinersiniarlutik, tassungalu tulliupput piniarneq aamma aalisarneq.
Apersorneqartulli 3 procentiinnaasa uranimik piiasoqalernissaanut apeqqut soqutigigaat misissuinerup takutippaa.
Kikkullu qinersisartut kissaataannik piviusunngortitsisussatut kissaatigineqarnersut qiviaraanni, qinersisartut isumaannik misissuineq naapertorlugu IA qinersisartut tamarmiusut 37 procentiisa missaannit qinerneqarluni qinersinermi ajugaassaaq, Siumut 29 procentit missaannit qinerneqarluni.
IA apersersorneqarnerpaavoq
Misissuinerlu naapertorlugu ukioqqortussutsimut agguataarinermi IA tamanit qinerneqarniarpoq - 35-it 55-illu akornanni ukiulit amerlanerussuteqalaarlutik. Siumumik qinersiniartut amerlanerpaartaat tassaapput 56-it sinnerlugit ukiullit - taakku 41 procentiullutik.
Misissuinerup aamma takutippaa Siumut - ileqquusoq malillugu - sinerissami qinerneqarnerpaassasoq. Partii pingaartumik Kommune Kujallermi Qaasuitsup Kommunialu aammalu nunaqarfinni tapersersorneqarluarpoq. IA-lu nuna tamakkerlugu assigiiaarnerusumik tapersersorneqarpoq, Kommuneqarfik Sermersuumili qinersisartoqarnerpaalluni.
Epinionip isumasiuinera pillugu paasissutissat
- Isumasiuineq Nunatsinni innuttaasut 731-t nalaatsornerinnakkut toqqakkat apersorneqarnerinik toqqammaveqarpoq.
- Paasissutissanik katersuineq piffissami novembarip arfernanit 17-ianut ingerlanneqarpoq. Apersuisut marluinnik oqaaseqartuupput apersorneqartullu kalaallisut danskisulluunniit akissuteqarnissaminnut periarfissinneqarlutik. Apersorneqartut 87 %-ii kalaallisut akissuteqarput 13 %-illu danskisut akillutik.
- Oqarasuaatit normui atorneqartut TelePostimit pissarsiarineqarput, tassaallutillu oqarasuaatit nalinginnaasut, angallattakkat aammalu Tusassillit normui.
- Kisitsisitigut paasissutissat nangaanartoqassusiat annerpaamik +/- 3,6 procentiuvoq.
