IA Demokraatillu: Kanukoka akiminut naleqqiullugu naammaginanngilaq
Kommuneqarfik Sermersooq Kanukokamit ilaasortaajunnaarpoq. Tamanna kommunalbestyrelsip ippassaq ataatsimiinnerani aalajangerneqarpoq.
Aamma atuaruk Kommuneqarfik Sermersooq Kanukokamit anivoq
Kommunit kattuffiata saniatigut allamik periarfissaqannginneq illuatungiliuttut naammagittaalliutigaat. IA-lli gruppiani siulittaasup Mille Søvndahl Pedersenip kommunip annaasaqarnissaanut ernumassutissaqannginnerarpaa.
- Maannakkorpiaq ilaasortaagaluarutta ilaasortaanngikkaluaruttaluunniit assingaa. Ikinnerussuteqartuartilluta allannguuteqarnavianngilaq, taamaammat eqqarsaatigisariaqarparput, akissaqartipparput?
- 4 millionit koruuninik aningaasarpassuupput, Mille Søvndahl KNR-imut oqarpoq.
Aamma atuaruk Kommune imminut sunniuteqarunnaarsissinnaavoq
Naalakkersuisut naligiissaarinermik aaqqissuussinermi kingullermi Kommuneqarfik Sermersuumit 54 millionit koruuninik tigusinissaminnik aalajangersimanerat aamma tikkuarpaa.
- Taakku aningaasarpassuupput, taamaammat allaanerusumik eqqarsartariaqarpugut. 4 millionit koruunit allanut atorluarsinnaakutsoorpagut, taama oqarpoq.
Kommuneqarfik Sermersooq kommunit kattuffiannut ukiumoortumik 4 millionit koruuninik akiliuteqartarpoq.
Aqqusaaqqaagassaq akisuallaartoq
Kommunimi borgmesterip tulliata Demokraatillu siulittaasuata, Anda Uldumip, Kanukoka ukiut sisamat matuma siornali isornartorsiorpaa.
- Kommunip aamma Namminersorlutik Oqartussat akornanni attaveqaqatigiinnermi Kanukokap aqqusaaqqaartariaqarnera akisuallaaralugu Kanukokap matuneqarnissaa Demokraatinit taamani siunnersuutigaarput, taamatullu isumaqarnerput suli aalajangiusimavarput, Anda Uldum oqarpoq.
Kommunit 18-iusimasut sisamaannanngortinneqarnerisa kingorna Kanukoka pisariaarussimasoq Mille Søvndahl Pedersen IA-meersoq aamma Anda Uldum isumaqarput. Aammattaaq Kanukoka kommunertik sinnerlugu iliuuseqartarsorinngilaat.
