Kommune imminut sunniuteqarunnaarsissinnaavoq
Kommunilli ilaasortaajunnaarluni kisimiilernissaa akikitsuinnaanavianngilaq. Tassami kommuni taamaalilluni imminut sunniuteqarsinnaajunnaarseriaannaavoq.
Aamma atuaruk Kommunalbestyrelsimut ilaasortaq: - Kanukoka malunnaataaruppoq
Storm Ludvigsenip siunnersuutaani takuneqarsinnaavoq ilaasortaajunnaarnerup kinguneranik Namminersorlutik Oqartussat siunissami Kommuneqarfik Sermersuumut aamma Kanukoka-mut, kommunit sinneruttut pingasut sinnerlugit isumaqatigiinniartumut isumaqatigiinniartassapput. Matumanili kukkusimasinnaavoq.
Namminersorlutik Oqartussani Nunami namminermi allaffeqarfiup Radioaviisimut oqaatigaa, kommunimi akissarsianut tunngasut Namminersorlutik Oqartussanit aamma Kanukokamit suli isumaqatigiinniutigineqartassasut. Tassa Inatsisartut inatsimmik allannguinissamik aalajangersaanngippata.
Aamma atuaruk Kommuneqarfik Sermersooq KANUKOKA-mit aninialerpoq
Tamatuma saniatigut nalinginnaasumik piniakkanik pisassiissutit, kommuninut ataatsimoortumik tapiissutit, nalimmaassaanissamut isumaqatigiissutit, missingersuutit pillugit suleqatigiinnerit suliassallu allat Namminersorlutik Oqartussat aamma Kanukokap isumaqatigiinniarnerisigut aalajangersaavigineqartarput.
Namminersorlutilli Oqartussat Kanukokap saniatigut allanik isumaqatigiinniarsinnaanerat inatsisini arlaaniluunniit allassimanngilaq. Kommuninik Kanukokap avataaniittunik isumaqatigiinniarsinnaapput imaluunniit isumaqatigiinniarumanatik aalajangiussinnaavaat. Taamaattumik Kommuneqarfik Sermersooq sunniuteqassanersoq Naalakkersuisut ajunngisaarnersut apeqqutaassaaq.
- Maanna taama inissisimavugut, sunniuteqarsinnaanngikkaannili tmanna eqqumiissaqaaq, tamannali taama pisoqarpat aliasuutiginnarneqassaaq, kommunimi ilaasortaajunnarniartumi kommunimi atorfillit qullersaat Steffen Ulrich-Lynge oqarpoq.
