Politikki

Pisortatigoortoq: Kommuneqarfik Sermersooq Kanukokamit anivoq

Tamannalu Siumumit Atassumiillu taperserneqanngilaq, taakkumi taasisoqalermat kommunalbestyrelsip ataatsimiittarfia qimappaat, Kommuneqarfik Sermersoorlu kommunit kattuffiannit januaarip aallaqqaataani 2016-imi atuutilersumik ilaasortaajunnaassaaq.

Allattoq Camilla Dam

septembarip 24-at 2014 09:09

- Isumaqarpugut KANUKOKA-p oqaluttuarisaanermi inissisimanera tamaanga killeqartoq, ukiullu tamaasa 4 mio. kr-nik kattuffiup ingerlanneranut akiliuteqartarnerput innuttaasut tungaannut illersorsinnaanatigu.

AAMMA ATUARUK Kommune imminut sunniuteqarunnaarsissinnaavoq

- Aningaasatigut ajornartorsiornerup nalaani, soorlu maanna taammaattugut, ilaasortaaginnarnissaq tassaassaaq akisuussaassuseqarani politikkikkut ingerlatsineq. Tamakkiisumik ilaasortaasutut eqqortumik ilimagisinnaasaraluatsitut tapersersorneqanngilagut – ilimagisimagaluarparput kattuffik partiit politikkikkut soqutgisaaannik ingerlatsiviunani siunertaminik piviusunngortitsissasoq, IA-p Demokraatillu Kommuneqarfik Sermersuummi ilaasortaatitai sinnerlugit Mille Søvndahl Pedersen, Storm Ludvigsen aamma Anda Uldum taama allapput.

IA Demokraatillu aamma allapput naligiissaarinermik aaqqissuusseqqinnissaq pillugu isumaqatigiinniartoqarnerani Kanukoka pakatsissutigisimallugu.

Aamma atuaruk Kommunalbestyrelsimut ilaasortaq: - Kanukoka malunnaataaruppoq

- Kommuninik iluarsartuusseqqinnerup kingornali KANUKOKA-p siunertaa takujuminaalliartuinnarsimavoq, kommunit ilaasortaasut 18-iniit sisamaannanngornerat soqutiginagu allaffissornikkut ingerlatsineq ukiumut 10 mio. kr sinnerlugit akeqartoq ingerlatiinnarmagu.

- Ukiullu kingulliup ingerlanerani nalimmassaasarnerup iluarsartuuteqqinnissaanik isumaqatiginnniarnerni ersarissilluinnarpoq Kommuneqarfik Sermersuup kattuffimmut ilaasortaanini annertunerusutigut iluaqutiginngikkaa, taama allapput.

Aamma atuaruk Kommuneqarfik Sermersooq KANUKOKA-mit aninialerpoq

IA Demokraatillu aamma allapput kommunit sisamaasut "toqqaannartumik pisariaqanngitsumik akisoqisumillu allaffissornikkut ingerlatsinertaqanngitsumik oqaloqatigiillutillu ataatsimoorussaminnik ataqatigiissaaffigisinnaasaannik" suleqatigiinnissaat qilanaaralugu.

Siumup ilaasortaatitai arfineq-pingasuusut Atassutillu ilaasortaatitaata ataaseq ataatsimiinnermit anisimanngikkaluarpataluunniit aninissaq kommunalbestyrelsimi 20-nik ilaasortaqartumi aamma amerlanerussuteqarfigineqarsimassagaluarpoq.

Nutaarsiassami kukkunermik nassaarsimaguit uunga allaffigineqarsinnaavugut.