IA: Borgmesterit saniatigut aningaasarsiussanngillat
Nunatsinni borgmesterit ukiumut 918.000 koruuninik akissarsiaqarnermik saniatigut aningaasarsiornerusariaqanngillat, Inuit Ataqatigiinneersoq Ane Hansen taama isumaqarpoq.
Taamaammat Inatsisartut ukiaanerani ataatsimiinnissaannut siunnersuutigaa Naalakkersuisut peqquneqassasut malittarisassioqqullugit, borgmesterit borgmesteritut atuuffimmik saniatigut inuussutissarsiutinik ingerlatsisinnaanerat aningaasarsiorsinnaanerallu pisinnaajunnaartillugu.
- Naalakkersuisut tunngaviusumik atuuffittut qinigaanermik saniatigut suliffimmik inuussutissarsiummilluunniit allamik ingerlatsisinnaanngillat. Tamanna aamma Inatsisartut siulittaasuannut atuuppoq, Inuit Ataqatigiit sinnerlugit Inatsisartuni ilaasortaq Ane Hansen siunnersuuteqarnerminut tunngavilersuutitut taama allappoq.
Soqutigisat aporaassinnaanerannut aarlerinaammik killiliinissaq taamatut siunnersuuteqarneranut tunuliaqutaavoq, tassunga ilanngullugu inuttut soqutigisat atuuffimmik ingerlatsinermut sunniuteqarsinnaanerannut aarlerinaateqarneq pissutigalugu, ilaatigullu atuuffimmik isumaginninnerup piffissaq tamakkerlugu isumaginninnissaq tamakkiisumillu aallussillunilu tunniusimanissamik qulakkeerumallugu.
Borgmesterit Siumumeersut eqqugaassapput
Siunnersuut akuerineqassappat borgmesterit Siumumeersut marluk eqqugaassapput. Aviisi AG taama allaaserisaqarpoq.
Ole Dorph, Qaasuitsup Kommuniani borgmesteri, nammineq akunnittarfiuteqarpoq, Jørgen Wæver Johansenilu suliffeqarfimmik namminersortumik imermik pitsaalluinnartumik Qeqertarsuarmeersumik tunisassiortussamik pilersitsinissamik pilersaarutinik suliaqarsimalluni.
- Kommunit kattussuunneqarneranni borgmesterit akisussaaffiat suliassaallu siusinnerusumut sanilliullugu annertuumik annertuseriarput, ullumikkullu borgmesteriuneq ulloq naallugu atuuffittut naatsorsuunneqartariaqarpoq, Ane Hansen oqarpoq imalu itisiliilluni:
- Taamaammat aamma borgmesterivut pillugit aalajangersakkanik, borgmesterit piffissaminnik atuuffimminnik suliffimminnillu allamik suliffeqarfiutiminnilluunniit piffissamik avitsinatik piffissaq tamakkerlugu atuuffimminnik isumaginninnissaanik qulakkeerinnittunik atuutilertitsinissaq naapertuuppoq.
