Henrik Leth siulersuisuni ilaasortaajunnaarsinneqartoq

Inuussutissarsiutinik ingerlataqartoq Henrik Leth Nunatsinni Naatsorsueqqissaartarfiup siulersuisuinit ingerlaannartumik Naalakkersuisunit ilaasortaajunnaarsinneqarpoq, Atuagagdliutit taama allaaserisaqarput.
apriilip 26-at 2017 06:50
Nutserisoq Simon Uldum -

Inuussutissarsiutinik ingerlataqartoq Henrik Leth Nunatsinni Naatsorsueqqissaartarfiup siulersuisuinit ingerlaannartumik Naalakkersuisunit ilaasortaajunnaarsinneqarpoq, Atuagagdliutit taama allaaserisaqarput.

Ilaasortaajunnaarsitsisoqarnera siulersuisut siulittaasuata Vøgg Løwe Nielsenip uppernarsarpaa, ilaasortaajunnaarsititsisoqarnissaanillu ilisimatinneqarsimanani ilanngullugu ilisimatitsissutigalugu.

Henrik Leth aningaasaqarnermik naatsorsueqqissaarnermillu ilinniagaqarpoq, pilersaarutillu malillugit Nunatsinni Naatsorsueqqissaartarfiup siulersuisuini 2019-imi juunip qaammataata tungaanut ilaasortaasussaagaluarluni.

Siulersuisut siulittaasuata Vøgg Løwe Nielsenip Atuagagdliutinut oqaatigaa siulersuisuni ilaasortamik naalakkersuisut namminneq toqqarsimasaminnik maannaannaq ilaasortaajunnaarsitsinerat 'tunngaviusumik kukkunerusoq'.

Ilaasortaajunnaarsitsinerlu politikkikkut ajornartorsiutaanasoraa.

- Oqaluuserissavarput taamatut pisoqarnissaata pinngitsoortinnissaanut inatsisivut ersarinnersut. Isumaqarpunga inatsisip pinngitsoortissinnaasariaqaraa piffissaanngitsukkut tunngavissaqarpiaranilu
soraarsitsisoqarsinnaanera. Maannakkut inatsisip tamanna pinngitsoortissinnaanngippagu
misissortariaqarparput inatsisillu allanngortinnissaanut siunnersuuteqarluta, Vøgg Løwe Nielsen taama oqarpoq.

Henrik Lethip ilaasortaajunnaarsinneqarnera aningaasarnermut naalakkersuisup Aqqaluaq B. Egedep maannamut suli oqaaseqarfiginngilaa.