Hashingaatsiarsuaq pillugu Islandimi eqqartuussineq: Kalaallit marluk katillugit ukiuni aqqanilinni parnaarussassanngortitaasut
Islandimi eqqartuussivimmi ullutsinni suliassat maluginiarneqarnerpaat ilaat qaammatip missaani piareersarneqareerluni, ataasinngornermi ualisoq pineqaatissiinnermik inerneqarpoq. Pisoq Kalaallit Nunatsinnut attumassuteqangaatsiarpoq.
Kalaallit angutit marluk, Poul Frederik Olsen aamma Henry Fleischer, 54-inik 34-nillu ukiullik, angullu Danmarkimeersoq, Jonaz Rud Vodder, 21-nik ukioqartoq, ikiaroornartumik 160 kiilungajammik oqimaassusilimmik angallamut tingerlaatilimmut toqqorlugit Islandimukaakkaat juunimi paasineqarput.
Taama islandimi nutaarsiassaqartitsivik Visir allaaserisaqarpoq.
Unnerluussisussaatitaasut isumaqarput, angallat Danmarkimiit aallarami Kalaallit Nunaannukaartilluni Islandimut aqqusaaginnartuusoq.
Poul Frederik Olsen ukiuni arfinilinni parnaarussassanngortinneqarpoq, Henry Fleischer ukiuni tallimani parnaarussanngortitaasoq. Angut Danmarkimeersoq ukiup aappaata qeqqani parnaarussaassaaq.
Parnaarussassanngortitaanerup saniatigut angutit pingasut eqqartuussivimmi suliamut atatillugu aningaasartuutit tamaasa akilissagaat, eqqartuussivik aalajangerpoq
Angut 21-nik ukioqartoq unnerluussummi allaaserineqartut malillugit atortussanik Danmarkimiit Islandimut timmisartorluni pajuttussaasimavoq.
Atortussallu Garðskagavita-p ungasinngisaani sissami – Islandip kujataaniittumi – tunniunneqartussaasimapput.
Aasarli tigummigallarneqartut
Pilersaarutaalli kipusoorluinnarput.
Kalaallit angutit aappaa gummibåderluni nunamut ikaartorlu politiinit erniinnaq unguneqarput, kinguninngualu tigusariaqarlutik.
Angutit kalaallit marluk ikiaroornartulerimik inatsimmik unioqqutitsingaatsiartutut pisuutitaapput, angut Danmarkimeersoq pinerlunnermut atatillugu ikiuussimasutut pisuutitaasoq.
Angutit tamarmik juunip 23-anili Islandimi politiinit tigummigallagaapput.