Hashi kilisaammi arsaarinnissutaasoq

Danskit akitsuuserinermut aqutsisoqarfiat Royal Greenlandimit nammineq kilisaataatimini pasinartoqarsinnaanera pillugu ujaasisoqarnissaanik kalerrinneqarpoq.

Tamannalu iluatsitsiviusoq, Nordjyllandip politiivi paasissutissiipput.

Akitsuuserinermik aqutsisoqarfimmi kilisaammi hashimik 100 grammimik nassaarpoq, taannalu arsaarinnissutigineqarpoq aserorterneqartussanngortinneqarlunilu, Nordjyllandip Politiivi suliamik nangitsisut paasissutissiipput.

Hashi 100 grammi kilisaatip Skagenimi tulannganerani nassaarineqarpoq, taamaammallu Nordjyllandip politiivisa suliaq tiguaa.

'Akuersaarneqarsinnaanngilluinnartoq'

- Hashi aserorterneqassaaq, suliarlu nassaarinninnermi suliatut suliarineqassalluni, Nordjyllandip politiiv allakkatigut akissuteqarput.

Royal Greenlandip umiarsuaatitik ikiaroornartunik anngiortumik eqqussinermut atorneqarneqarnissaat pinngitsoortinniarlugu annertunerusumik suliniuteqarluni tusagassiuutinut nalunaarutigaa.

- Kilisaataatigut atorlugit eqqussineq, eqqunniakkat qanorluunniit annertutigigaluarpata, akuerineqarsinnaanngilluinnarpoq, Royal Greenlandimi tunisassiornermut pisortaq, Lars Nielsen oqarpoq.

- Aanngajaarniutinik anngiortumik nunatsinnut eqqussinerup aningaasatigut pissarsiaqaataanissaa eqqarsaatigalugu qanoq ilinikkulluunniit eqqusseriartoqarsinnaasartoq ilisimavarput – aamma kilisaataatitsinniit. Taamaammat eqqussinissaraluaq pinngitsoortinniarlugu annertuumik suliaqartarpugut, Lars Nielsen oqarpoq.