Hans Hedtoftip umiiarneranit ukiut 60-inngornerat Holmens Kirkenimi malunnartinniarneqassasoq
”Kigaatsumik kiviartorpugut …”
Umiarsuup M/S Hans Hedtoftip Qaqortumit Københavnimut angalaqqaarnermini Nunap Isuata kujataatungaani januaarip 30-ani 1959-imi kivinnginnerani umiarsuarmit nalunaarutit kingulliit ilaat taama oqaasertaqarpoq.
Ilaasut 95-iusut tamarmik ajunaarput.
Ajunaarneq nunatsinni Danmarkimilu inuiaqatigiinnut alianarluinnartuuvoq, ajunaartunullu ilaqutaasut inuunerat allanngorluinnarpoq.
AAMMA ATUARUK Umiarsuaq nanineqassaaq
Taakku ilagaat Danmarkimeersoq Kirsten Sietam. Ataatani arfineq-pingasunik ukioqarluni annaavaa.
- Aliasunneq maqaasinerlu ukiorpassuarni atugaraakka. Inersimasuuninnili soorunami aliasunnera anginngilaq, inuuninnulli tamarmut sunniuteqarpoq, ilaquttannullu taamani ullumikkullu aamma sunniuteqarluni, KNR-imut taama oqarpoq.
Kirsten Sietamip ajunaartumut kinguaasoq alla, Sandra Vinding, peqatigalugu Hans Hedtoftip umiiarnerani ajunaartunut ilaqutaasut katersuuffiat ”Pårørendegruppen efter Hans Hedtofts forlis 1959” ukiuni qulikkuutaani kingullerni siuttuuffigaa.
Palasi: Pisut akuerinissaat pingaarpoq
Narsap katersugaasiviata M/S Hans Hedtoftip umiiarnera pillugu saqqummersitsineq imarsiortut oqaluffiannut Holmens Kirkenimut atukkiuppaa. Aamma puttaqut umiarsuarmeersoq Qaqortup Oqaluffianit atukkiunneqarpoq.
Umiiartoqarneranut pissutaasoq paasineqanngisaannarpoq. Ajunaarnerli Folketingimi politikkikkut annertuupilussuarmik perulluliuutaavoq, umiarsuaq naalagaaffimmit sanatinneqarlunilu akiligaammat.
AAMMA ATUARUK Umiarsuup Hans Hedtoftip umiiarneranit ukiut 55-it ullumi qaangiussimalerput
Aamma ajunaarneq sioqqullugu, taamani Kalaallit Nunaannut ministeriusup Johannes Kjærbølip (S) KGH-llu umiarsuaani naalakkat nunatsinni ukiukkut imaatigut angalanerup navianassusia annertuumik isumaqatigiinngissutigivaat.
Ajunaarnerup kingorna nunatsinni Danmarkimilu nuna tamakkerlugu katersuiniartoqarpoq, naalagaaffiullu aningaasaateqarfik Grønlandsfonden af 1959 pilersippaa. Aningaasat katersorneqartut aningaasaateqarfillu nunatsinni Danmarkimilu qimagaasunut aningaasatigut ikiorsiinissamik siunertaqarput.
Kingornali paasineqarpoq ilaqutariippassuit neriorsuutigineqartutut aningaasatigut ikiorserneqarsimanngitsut. Aammattaaq ajunaarnerup pissutaanut akisussaaffik inissinneqanngisaannarpoq.
AAMMA ATUARUK Hedtoftip umiiarnera politikkikkut mamminanartuliatut taagorneqalerpoq
Holmens Kirkemi provsti, Ejgil Bank Olesen, naapertorlugu ajunaarnermit ukiut 60-it qaangiukkaluartut eqqaaniarneqarnissaa pingaarpoq.
- Eqqaaniaalluni naalagiartitsinerit pingaaruteqartupilussuusoraakka. Toqusut eqqaaniaannarnagit – soorunami aamma tamanna pingaarpoq – alisunnerli, annilaanganeq neriuutaarunnerlu pigineqarsimasut pillugit. Tassalu pisimasut akuerineqaqqullugit.
Eqqaaniaaneq Københavnimi Holmens Kirkenimi januaarip 30-ani nal. 13.00-mit pissaaq.
