Hans Enoksenip Aki-Matildallu inoqatinut attaveqaat Tik Tok qineqqusaarnermi atoraat
![](/sites/default/files/styles/image_934x467/public/article_images/20221103_173816_0000.png?itok=Iq6xPn1Q)
Naleqqameersoq, Hans Enoksen, Namminersorlutik Oqartussat allaffeqarfissuata silataaniitilluni inuit attaveqatigiittarfiatigut Tik Tokikkut videoliorpoq.
- Nunatsinni danskit Folketingimi oqaluttarfimmi takorusussagaannga. Qinerisinga, Hans Enoksen oqarpoq kullunilu illuttut nittarlugit.
Immaqali nunatsinni politikkimi sivisunerpaamik akuusut ilaata attaveqatigiittarfimmi ingammik inuusuttunit nuannarineqarluartumi, Tik Tokkimi, taassuma videonik ilaarutiginninnernillu siaruarteriffiulluartartumi saqqummernissaa ilimanarpallaanngikkaluarpoq.
- Aki-Matilda Høegh-Dam (Siumut) Aaja Chemnitzilu (IA) Folketingimut qinigaaqqipput.
- Demokraatineersoq Anna Wangenheim taaguunneqarnerpaat pingajoraat, Naleqqameersorlu Hans Enoksen sisamaattut inissilluni.
- Qinersisinnaasut 47,8 procentii Folketingimut qinersipput.
Folketingimulli qinigassanngortissimasut inuit attaveqatigiittarfiini ingammik inuusuttunik naapitsiffissanik atuilluarsimapput.
Naapitassarsioriaaserlu tamanna nunatsinni politikkerinut nutaajusoq, tusagassiuutinik Ilisimatusarfimmi ilisimatusartoq Naimah Hussain oqarpoq.
- Folketingimut qinersinerni kingullerni qinersisut amerlagisassaasanngillat. Taammaat qinerserngaartussat aappassaanilluunniit qinersisussat qinersinissamik politikkikkut anguniakkanik inuit attaveqatigiittarfiisigut angussivigalugit immaqa soqutiginnilersinneqarsinnaasut, Naimah Hussain oqarpoq.
Inuusuttut anngussiviginiarpasikkaat
Nunatta inuisa 80 procentiisa missat Facebookertarput, taamaammat inuit attaveqatigiittarfiinik nuannarisaqartuusugut qularnanngilaq.
Politikerit Facebookimik aamma qinersinerni siuliini atuilluartarput, qinersisartorpassuarnut taamaalillutik attaveqarsinnagamik.
Kisianni Tik Tok aamma Instagram, ingammik inuusuttunit 16-it 24-llu akornanni ukiulinnit atorneqartartuusut, maanna qinersinermi Inatsisartunullu kingullermik qinersinermi atugaalernerat nutaajusoq, Naimah Hussain naliliivoq.
Ingammik Naleqqamit Folketingimi qinigassaasuni marluk, Juno Berthelsen aamma Kista Fencker, inoqatinut attaveqaatinik atuilluarput, taakkumi Tik Tokikkut Instagramikkullu videoliortaarlutik malugeqquniarput.
- Inuusuttut ingammik Instragram Tik Tokkilu atorluarlugit sapinngisamik anngussiviginiarpasippaat, Naimah Hussain oqarpoq.
Siumumit Folketingimut qineqqusaartuni marluk, Aki-Matilda Høegh Dam aamma Elvira Kuitse, Tik Tokkikkut aamma videoliorput nipilersuutinillu siammarterillutik.
Taamaaliornerili qinersinerup inerneranut ilumut sunniuteqarnersoq oqaatigiuminaattoq, Naimah Hussain naliliivoq:
Imaattariaqanngilarli qinersisartorpassuit partiinut allanut qinersiataartut. Inuusuttulli amerlanerusut qinersinerannik immaqaluunniit qinersisoqarneranik imalu ittunik anguniagalinnik parteeqarneranik paasisaqarnerannik kinguneqarsinnaasoq, taanna oqarpoq.
Ukiuni 35-ni aatsaat taama qinersiartortukitsigisoq
Folketingimulli nunatsinni qinersisut amerlagisassaanngillat.
Qinersisinnaasummi 47,8 procentinnaat marlunngormat qinersiartorput. Tassa Folketingimut qinersisut 1987-ip kingornanit aatsaat taama ikitsigipput.
Nunatsinni partiit danskit partiivinut sanilliukkaanni oqaatiginiakkaminnik Facebookikkut anngussinermut aamma aningaasartuuteqarujussuanngillat.
Nunatsinnit Folketingimut qinigassaasut Facebookikkut siammarterinikkut qineqqusaarnermut aningaasartuutaat katillutik 1864 koruuniupput.
Danmarkimi qinigassaasut tamatumunnga aningaasartuutaat katillutik 21, 7 millionit koruuniupput, Savalimmiunilu 1165 koruuniullutik.
Aki-Matilda Høegh-Dam (Siumut) Folketingimut qinersinermi 33,3 procentinik qinersiseqarluni taaguunneqarnerpaagami qinigaaqqippoq. IA-meersoq Aaja Chemnitz Folketingimut qinersinermi 21,6 procentinik qinersiseqarluni aamma qinigaaqqippoq. Tassa Folketingimut qinigaaffinni pingasuni ilaasortaalersimalerpoq.
Naleqqameersup Hans Enoksenip Demokraatineersoq Anna Wangenheim taaguunneqarnerpaani pingajuusoq kingoraarlugu sisamaattut inissippoq.