Hamas: Israel Gazami sakkuaakkunnaarallarnermi saassussinanilu tigusarinninnianngilaq
Israel Gazamik saassussinnginnissamut inunnillu tigusarinninnginnissamut, Gazami ulluni tulliuttuni sisamani sakkuaakkunnaarallarnissaanik isumaqatigiissusiornikkut imminut pisussaaffilerpoq.
Islamsiortut Hamasikkut, attaveqaqatigiittarfikkut Telegramikkut taama ilisimatitsisut, nutaarsiassaqartitsivik Reuters allappoq.
Hamasip sallunaveeqqutitut tigummiaasa ilaat 50-it ulluni tulliuttuni sisamani iperagaanissaat, Israelip Palæstiinallu isumaqatigiissutigaat.
Arnat meeqqallu iperagaanissaat uani pineqarpoq.
Sallunaveeqqutitut tigummiarneqartut akornanni iperagaasussat tassaapput amerikamiut pingasut, taakkunannga ataaseq niviarsiaraq sisamaliingajalersoq.
Islamisiortut Hamasikkut Israelimik oktobarip ulluisa arfineq-aappaanni saassussilerput, inuit 240-t missaat sallunaveeqqutitut Hamasimit tassani tigusarineqarlutik.
Israel taamanikkut saassunneqarmalli Israelimiut 1200-t missaat toqutaasimasut, Israelimi oqartussat nalunaarutigaat. Inuit 1400-t toqutaasimasut aallaqqaammut oqaatigineqaraluarpoq.
Palæstiinamiut 14.100-nit ikinnerunngitsut Gazami toqutaasimasut, Gazami aqutsisut Hamasikkut nalunaarutigaat. Taakkunannga 5840-t meeraasut 3920-llu arnaasut Hamasip oqaatigaa. Kisitsisit saqqummiunneqartut arlaannaannulluunniit attuumassuteqanngitsumit uppernarsarneqarsinnaasimanngillat.
Israelip Hamasillu akornanni sorsunneq sakkuaakkunnaarallarnissamik isumaqatigiissut atorunnaarpat soraarnavianngitsoq, Israelip ministeriunerata Benjamin Netanyahup isumaqatigiissusiortigatik oqaatigaa.
