Greenpeace: Danmarkip Kalaallit Nunaat salloqittarsimavaa
Avatangiisit isumannaatsunissaat pillugit Danmarkip Kalaallit Nunaat salloqittarsimavaa.
Greenpeace taama isumaqarpoq. Avatangiisit akisussaassuseqanngitsumik iliorfigineqarsimapput, eqqakkat ulorianartut tonserpassuarnik oqimaassusillit Pituffiup eqqaani nunap qeriuaannartup ataanut katersorneqarsimammata.
Greenpeacemi issittoq pillugu akisussaasoq Jon Burgwald taama oqarpoq.
Soorlu Naalagaaffeqatigiit suliassamik nuanninngittumik tigusisimasut, siunersissaanngitsumik toqqaveqarluni amerikamiut namminneq saliinissartik akisussaaffiginngimmassuk.
2012-imi avatangiisinut Naalakkersuisuusut Anthon Frederiksen aamma Karen Ellemann eqqakkat Danmarkiliaallugit isaterneqarnissaat pillugit isumaqatigiissusiorput.
Aamma atuaruk Pituffimmi eqqakkat pillugit: Isumaqatigiinniutigineqaqqissinnaanngilaq
Saliinissaq pillugu Namminersorlutik Oqartussat Danmarkimiit taamani 40 millioner koruuninik pissarsipput.
Issorli mingulik pillugu EU'p malittarisassaaniittut uniffigineqariataarput Danmarkiliaassinissarlu unitsiinnarneqarluni. Ilutigitillugulu paasineqarpoq eqqagassat 50 tonsiunatik 3500 tonsiusut.
Tassani qallunaat oqartussaasui akulerussimasariaqaraluartut, Jon Bugwald oqarpoq.
- Eqqakkat annertussusaannik nalileeqqaarneq - eqqakkat ulorianartorujussuit annertussusaannik - tassaasimavoq danskit oqartussaasuisa suliassaat. Paasinarsivorlu naliliineq kukkusorujussuarmik annikinaarinerusoq. Kinguneraalu Kalaallit Nunaata taartisissutai taamani aamma minnaarneqarneqarmata. Taamaattumik kukkuneq danskit oqartussaasuisa annertuumik akisussaaffigaat.
Aamma atuaruk Pituffiup eqqaani Uummannami eqqakkat pillugit ministeri nassuiaateqartariaqarpoq
Danmark iliuuseqarnerusariaqartoq
Eqqakkat nunamut assaanneqarsimasut isaterneqarnissaat pillugit nutaamik Kalaallit Nunaannut isumaqatigiissusiornissamut Danmark piareersimasariaqarpoq.
- Eqqakkat ulorianartut tamakkununnga suliarinnittarfiliaanneqartariaqarsimagaluarput, Danmarkimi amerikamiunut isumaqatigiissummik pitsaasumik suliaqarsimasinnaasimannginnami, Danmark saliinissamut suliniuteqarnerusimasariaqaraluartoq, Greenpeacemeersoq oqarpoq.
Anthon Frederiksen politikerillu Inuit Ataqatigiinni ilaasortat arlaqartut isumaqarput, Pituffiup eqqaani eqqagassat pillugit Nunarput Danmarkilu nutaamik isumaqatigiissusiortariaqartut.