Pituffiup eqqaani Uummannami eqqakkat pillugit ministeri nassuiaateqartariaqarpoq

Naalakkersuisut aamma danskit avatangiisit pillugit ministeriaqrfiat 2011-mi isumaqatigiissuteqarput amerikamiut eqqagaat ulorianartut Kalaallit Nunaata nammineq isumagissagaat, taamaalillunilu Kalaallit Nunaat 40 millioner koruuninik tapiiffigineqarluni.

Maannali paasinarsivoq eqqakkat naatsorsuutigisamit annertunerujussuusut. Aamma paasinarsilluni, eqqakkat ulorianartut EU-mut eqqunneqarsinnaanngitsut naak tamanna 2011-mi aamma isumaqatigiissutaagaluartoq.

- Taamani isumaqartigiissut kukkutaartoqarsimaneratigut imaluunniit tunngavilersuutit naammassimannginneranik pissuteqarsimassaaq, Johan Lund Olsen oqarpoq.

Tamannalu tunngavigalugu, Johan Lund Olsen piumasaqarpoq avatangiisit pillugit ministeri, Kristen Brosbøl nassuiaateqartariaqartoq.

Johan Lund Olsenip paaserusuppaa, isumaqatigiissutaasimasumi eqqakkat ulorianartut sooq 50 tonsiinnaanatik 3500 tonsiusutut maanna nalilerneqarsimanersut aamma paaserusullugu eqqakkat ulorianartut Kalaallit Nunaanniitiinnarneqarnissaat illersorneqarsinnaanersoq.

2012-mi isumaqatigiissutaavoq, eqqakkat EU-mut nassiunneqassasut, isumaqatigiissutilli atsiorneqarnerata kingorna paasinarsivoq, eqqakkat ulorianartut EU-p inatsisai naapertorlugit tamakku EU-mut eqqunneqarsinnaanngitsut.

- Soorluuna taamani isumaqatigiissutaasimasoq tunngavissaqaranilu kukkunikkut isumaqatigiissutaasimasoq, Johan Lund Olsen oqarpoq aamma paaserusullugu sooq eqqakkat annertussusaat taama qaffassimatiginersoq.

- Tamanna paasiniarneqartariaqarpoq aamma ministeri tamanna pillugu nassuiaasariaqarluni, Johan Lund Olsen oqarpoq aamma oqaarluni assut eqqumiigigamiut sooq eqqakkat ulorianartut Kalaallit Nunaata akisussaaffigissanerai.

- Eqqakkat pillugit akisussaasoq tassaavoq Danmark, Lund Olsen oqarpoq.

Taassuma aamma eqqumiigaa, Danmarkip EU-mut ilaasortaanertik tunngavigalugu, inatsisit suut atuuttuunersut ilisimasaqarfiginerunngimmatigit.