Great Greenland 2023-mi ‘naammagisimaarnartumik’ angusaqartoq
Great Greenland puisit amiinik tunisassiortoq 2023-mi angusamini anigueqqarpoq.
Suliffeqarfik 2023-mi 14,2 millionit koruuninik kaaviiaartitaqarpoq, ukiumullu sinneqartoorutai 531.000 koruuniullutik.
Suliffeqarfik ataasinngornermi ullaakkut tusagassiuutinut nalunaaruteqarput. Ilaatigut allapput ammit tunineqartut ikinnerugaluartut anguniakkatik anguneqartut. Taamaakkaluartoq ‘naammasseriikkanik’ – tassa aaqqatinik, isersimmatinik tunisaqarneq annikinnerulersimavoq.
Pisortarlu Preben Møller ukiumut angusanik naammagisimaarinnippoq.
- 14,4 millioninik kaaviiaartitaqarnissamik missingersuuteqarpugut, 1,9 millioninillu amigartooruteqarluta, taamaammat kaaviiaartitagut 14,2 millioniussapput, millionillu affaanik sinneqartooruteqarluta, taamaammat naammagisimaarpakka, pisortaq oqarpoq.
Akinik qaffaaneq naatsorsuutaasoq annaassisoq
Ukiumut angusani amigartooruteqarnissamik naatsorsuuteqarneq sinneqartooruteqarnermik inerneqarnera suliffeqarfiup assartuinermi akinik qaffaasoqarnissaanik naatsorsuuteqarsimagaluarpoq, taamaattoqanngitsorli, pisortaq oqarpoq.
2023-mili angusat ukiup siuliani angusanit annikinnerupput. Suliffeqarfimmi ukiup siuliani 2,7 millionit koruuninik sinneqartooruteqarpoq.
Sinneqartoorutilli 2 millionit koruuninik annikillinerunerannut pissusissamisoortumik pissuteqartoq, Preben Møller oqarpoq.
- Naammasseriikkanik amerlanerusunik quersuarmiittussanik tunisassiorpugut, tamatuma saniatigut tunisaqarneq ukiup siulianitulli annertussuseqanngilaq, taamaammat inaarutaasumik inernerni kinguariaateqartoqarpoq, Preben Møller oqarpoq.
Naammagittarneq
Nioqqutissaasivimmit tunisassat amerlanerutinnissaat pissutigalugu tunisassiornerup annertunerulersinneqarnerata saniatigut suliffeqarfiup amminik nioqquteqartutik amernik pitsaasunik takunnissinnaanissamut pikkorissartippai.
- Taamaammat suliniut taanna sinerissamit ammit pissarsiatta pitsaassusaannut pitsaanerulersitseqataavoq, Preben Møller oqarpoq.
- Tamakkiisumilli angusat assartuinerup sivisussusaa pissutigalugu 2024-p naanerani aatsaat takuneqarsinnaalissapput, taanna oqarpoq.
Amernik nioqquteqartuminnut pikkorissaaneq pitsaanerusumik pitsaassuseqalersitsinissamut qulakkeerinneqataassasoq pisortap neriuutigaa, suliffeqarfik taamaalilluni misutaanngitsunik nalinginnaasumik qalipaatilinnik amerlanerusunik tunisaqarsinnaalissalluni.
Pikkorissaaneq suliffeqarfiup siunissami misutaanngitsunik nalinginnaasumik qalipaatilinnik amerlanerusunik tunisaqarsinnaalernissaanut qulakkeerisinnaassasoq neriuutigaa, piumaneqassusaallu nassuiaatissaavoq.
- Nalinginnaasumik qalipaatillit misutaninngaanniit piumaneqarnerupput, taamaamallu misutaanngitsunik tunisaqarneq aamma pitsaasuuvoq.
- Ataatsimut isigalugu 2023-mi angusat naammagisimaarnarput, ammit pitsaanerusimasuuppata amerlanerusunik tunisaqarsinnaagaluarpugut.
Naak sinneqartooruteqarnissamut qulakkeeriniarluni suliniuterpassuusariaqaraluartut suliffeqarfik 2024-mi amigartooruteqarnissamik missingersuuteqarpoq.
- 2024-mi annerullartumik amigartooruteqarnissamik missingersuuteqarpugut, Danmarkimi tuniniaanermut immikkoortortaqarfitsinni pisoqartussaanera ilaatigut pissutigalugu, Preben Møller.