Umimmaat ikippallaarnerat tunisassiortut nuersaajumatuullu akisunaalerpaat
![](/sites/default/files/styles/image_934x467/public/2024-02/430173809_1138508037068459_964333500411911437_n.jpg?itok=lhqsxFWo)
Pisiniarfimmi Qiviuni Nuummiittumi pisiassat assigiinngitsut soorlu ponchot kajuartut aamma puisip amianik taskiliat takussaaput. Nuersagassiat assigiinngitsunik torsussusillit nuersaanermik nuannarisalinnit pisiarineqariaannaallutik ilisivinniipput.
- Umimmaat qiviui iluartorujussuupput anigoruminaatsumik anniaatilinnut iluaqutaasarnermik. Paffikkut gigtertut taammaattunik atoraangamik iluarusuutigisaqaat. Nuersagassianik nittarsaassiutigaluni Mia Chemnitz, pisiniarfimmik Qiviumik piginneqataasoq oqaluttuarpoq.
Umimmaat qiviuinik nuersagassiaq qalipaaserneqanngitsoq 50 grammi maanna 625 koruuneqarpoq. Akili taamaaginnarnavianngilaq.
Kangerlussuarmi umimmaat 2018-imi kingullermik kisinneqartut amerlassussaat pillugu oqallittoqangaatsiareersorlu umimmaat kisinneqaqqipput. Ikilingaatsiarsimanerallu pissutigalugu ukioq manna umimmanniarnermi maanna ingerlasumi umimmaat 250-iinnaat pisarineqarsinnaapput. Pisarineqarsinnaasut amerlassusaat ukiut siuliinut sanilliukkaanni ikinnerungaatsiarput.
![](/sites/default/files/styles/image_934x467/public/2024-02/428236731_1104475150576711_7548010143460635016_n.jpg?h=e12af914&itok=uvVu-LX9)
Tamannalu umimmaat qiviuinik tuniniaasunut qissisartunullu kingunipiloqarpoq, ëqqugaasunullu ilaavoq pisiniarfik Qiviut. Tassani umimmaat qiviui qissineqartarput tuniniarneqarlutillu.
- Nuna tamakkerlugu umimmaat qiviuinik suliaqartartut 300 kilo agguaassinnaassagunarpaat. Nuersagassianik suliaqarnitsinni nalinginnaasumik 1.500 kilo atortarpaput, Mia Chemnitz oqaluttuarpoq
Taamaammallu nuersagassiat amillu akii qaffangaatsiartariaqarpaat, qanorli akeqalernissaat oqaatigisinnaanngikkallarpaa.
- Nuersagassianik pisiassaateqarnissarput qulakkeersinnaanngilaraluunniit, imaassinnaavormi pissarsiavut tamaasa nammineq atorivut taamaassappallu nuersagassianik tuniniaasinnaanngilagut, taanna oqarpoq.
Soraarsitsinerit erloqitsannartullu
Umimmaat qiviuisa atorneqarsinnaasut taama annertutigisumik sukkatigisumillu allanngornerat Mia Chemnitzip allallu sillimaffigisinnaasimanngilaat, tamannalu annermik Mia Chemnitzimut erloqitsannarpoq.
- Ukiup affaa kingulleq pisiniarfitsinnut aningaasaliingaatsiarpugut umimmanniarnerullu aallartinnissaanut piareersarluta maannali tassa nuersagassianik nunatsinni tunisassaaruppugut, pisinarfik qimerluujutigalugu taanna oqarpoq.
- Umimmaat qiviulerineq pikkoriffiginerpaasatuatta ilagigaluarpaat. Nunarsuarmimi pikkorinnerpaajugluarpugut oqarpoq nangillunillu:
- Qiviuleriuarsinnaanerpulli qularnarsivoq.
![](/sites/default/files/styles/image_934x467/public/2024-02/428177155_1443429339883289_5417756322492314160_n.jpg?h=4c636146&itok=8lzdbWqg)
Ukiut allortartugit umimmaat kisinneqartarnissaat piumasaqaataagaluarpoq. Taamaaliornikkummi umimmaat amerlassusaasa malinnaaviginissaa pisarineqarsinnaasullu eqqortumik amerlassusilertarnissaat ajornannginnerussagaluarpoq.
Piumasaqaalli taanna malinneqanngilaq, Mia Chemnitz oqaluttuarpoq.
- Taamaammallu ukiuni kingullerni arfinilinni umimmaat amerlavallaat pisarineqartarsimapput, amerlavallaaraluarmatami taamaaliorput, taanna oqarpoq.
Nuersagassanik tunisassaqassagunik akii qaffattariaqarpaat kisianni aamma ungasinnerusoq eqqarsaatigalugu Qiviumi sulisunik soraarsitsisariaqalersinnaapput. Nuummi pisiniarfimmi sullivimmilu inuit qulit maanna sulisorineqarput.
Umimmaat qiviuinik nuersagassianik pisiniarfimmi amigaateqarneq nalinginnaasuuvoq, taamaalinermilu qiviulerisut puisit amiinik suliaqartinneqalertarput.
- Great Greeenlandip puisut amiinik maanna tunisisinnaannginnera ilanngullugu ajornartorsiutigaarput. Taamaammallu sulisut allanik suliassaqartissinnaasaraluarlugit maanna nuutiinnarsinnaajunnaarpakka, taanna nassuiaavoq.
Pisisartummi?
Mia Chemnitz isumaqarpoq aallaqqaataaniilli piumasaqaatit malillugit ukiut allortarlugit umimmaat kisinneqartarsimagaluarpata allatut ingerlasoqarsimassagaluartoq.
- Ukioq manna pisassat maanna eqqartorpavut, aappaagumi? Imaluunniit aappaaguagu qanoq pisoqassava? Tupannartumik pisoqareermat taava kisitsisalissappat? Taanna aperaaq imalu nammineq akissutissaqarpoq:
- Naluarput, inuussutissarsiuterput naatsorsuutigalugu pilersaarusiorsinnaanngilagut.
Annermillu pisisartut sinnerlugit tanna ajuusaarpoq.
![](/sites/default/files/styles/image_934x467/public/2024-02/428350929_1379343362792814_294530754457637354_n.jpg?itok=DG7J2E_z)
Inuit umimmaat qiviuinik nuersakkanik nasallit aamma qungasequtillit Nuup aqquserngini takussaasaqaat. Pisiniarfik nuersagassianik inuit akissaqartitaannik tuniniaasinnaammat Mia Chemnitzip tulluusimaarutigaa.
- Maani najugallit akilersinnaasaannik pisiassaateqanngikkaanni nunatsinni suliffeqarfiuteqarneq soqutiginaateqanngilaq, taanna oqarpoq.
- Aanaap ernguttani nuersaassinnaajunnaarsinnaavai tassa tunisassiavut taama akisutigilersinnaapput. Tamanna kingunerit ilagisinnaavaat.