Tunup avannaarsuani umimmaat dronet atorlugit kisileraat

Ittoqqortoormiit avaannaani Jameson Landimi umimmaat 2000-imili kisinneqarsimanngillat. Tamannali iliuuseqarfigineqalerpoq. 

Pinngortitaq pillugu nunarsuaq tamakkerlugu suliniaqatigiiffiup WWF-ip Aalborgimi suliffeqarfik droneteknologimik ineriartortitsisartoq Robotto suleqatigilerpaa.

Taakku ataatsimoorlutik droneteknologi atorlugu nersutinik nujuartanik kisitsineq qanoq ajornannginnerusinnaanersoq akikinnerusinnaanersorlu misissussavaat. Umimmannillu kisitsineq tunup avannaarsuani aallartissutaassaaq.  

Umimmaat qangali kisinneqarnerat pissutigalugu umimmaqassuseq pillugu paasissutissat amerlanngillat, ukiunimi 20-ni kingullerni allanngorluinnartoqarsimasinnaavoq.

- Silap kianneruleriartornera uumasoqassutsimut sunniuteqangaatsiarsinnaavoq, uumasoqassuserlu appariangaatsiapallassinnaavoq. Sivisuumillu kisitsisoqarsimanngippat tamanna aallartiffissatsialaavoq, pinngortitaq pillugu nunarsuaq tamakkerlugu suliniaqatigiiffik WWF-mi suliniummik ataqatigiissaarisoq Kaare Winther Hansen oqarpoq. 

Uumasunik nujuartanik kisitsineq qulimiguullit timmisartullu atorlugit nalinginnaasumik pisartoq akisoqaaq. Dronelli atorlugit kisitsineq pisariinnerullunilu akikinnerussasoq neriuutigineqarpoq. Uumasummi assigiinngitsut siunissami ajornannginnerusumik kisinneqarsinnaalissapput, taamatullu tuttoqassuseq, umimmaqassuseq immaqalu arferit assigiinngitsut pillugit paasissutissat amerlanerulersinnaallutik.  

- Danskit suliffeqarfiutaata Robottop teknologi nutaat atorlugu droneliaasa anguteralaat kulavaallu assigiinngissusaat immikkoortissinnaavaat. Taamaaliornikkut paasissutissat massakkut misissuinerni akisuuni paasisakkagut pissarsiarisinnaalissavagut, Kaare Winther Hansen oqarpoq.  

Silaannaap allanngoriartornera aarlerinartoqartoq

Nunarsuatsinni umimmaat katillutik 25 procentiisa Kalaallit Nunaat najugaqarfiaat, taakku avinngarusimasumiipput assut silarlukkajuttumi. Umimmaat nungunneqannginnissaat illersorneqarnissaallu kisitsinermi siunertaavoq.

- Jameson Landimi umimmaat inuuniutigalugu saniatigullu piniartartunut  pingaaruteqartuupput. Umimmaat nutaamik neqissaqartitsisarput aningaasatigullu isertitsiviusarlutik. Umimmaat nungutsaalisariaqarput qitornavut ernuttavullu piniagassaqarsinnaaqqullugit, Ittoqqortoormiini piniarnermik nakkutilliisoq Erling Madsen WWF-ip tusagassiuutinut nalunaarutaani oqarpoq.

Piniarpallaarnerinnarli Kalaallit Nunaanni nersutinut nujuartanut aarlerinartoqartitsinngilaq.  

Silaannaap pissusia allanngoraluttuinnarpoq, tamannalu silarsuup sinneranut sanilliullugu issittumi silannaap sisamariaammik qaffasinnerusumik kissakkiartorneranik kinguneqartoq WWF tusagassiuutinut nalunaarummi allappoq.

Taakkulu naaperlugit issittumi misissuinerunissaq pingaaruteqarpoq, taamaaliornikkut uumasoqassuseq sunnerneqannginniassammat uumasoqatigiillu assigiinngitsut nungunnginnissaannik kinguneqassalluni.

Teknologi pillugu nersornaaserneqartut

Robotto suliffeqarfiuvoq jyllandip avannaaneersoq dronet softwarissaat pillugit 2019-mi suliffeqarfinngortoq teknologilu nutaat atorlugu nakkutilliissutinik inuttaqanngitsunik piginnaanilikkanik ineriartortitsisoq, taakkulu ineriartortitaat umimmannik kisitsinerup saniatigut allanik aamma piginnaasaqarput. 

Tassami suliffeqarfik TV2-p aallakaatitassiaani ’Min idé – vores mission’-mi marlunngormat ajugaapput.

Taakku ajugaassutigaat dronet atorlugit nunami ikuallattunik qamitsisinnaasunik ineriartortitsisimagamik. Ikuallaammi tassaapput silap kiannerulerneranik takussutissat, CO2-millu aniatitsisaqalutik.

Robottop Danmarkimi upalungaarsimanermut aqutsisoqarfik suleqatigilereerpaa, maannalu WWF-imik suleqateqalerluni. 

Umimmannik kisitsineq piareersarnertaqassammat aappaagu juulimi aallartissangatinneqarpoq, tassami umimmaat sumiinneri pillugit WWF Ittoqqortormiini innuttaasunik paasiniaaqqaarniarpoq.   

- Kalaallit Nunaanni ilisimatusarnikkut misissuisoqartillugu innuttaasut piniartullu peqataatinneqarnissaat pingaaruteqaqaaq, Kaare Winther Hansen oqarpoq.