Aalisakkanik tunisassianut tunngatillugu akit pilersarnerat misissussallugu tulluartinneqartoq

- Nunatsinni aningaasarsiornerput massakkut taamatut inissisimatillugu qimerloortariaqarparput aningaasat avammut annissukkagut, aningaasat ingerlaaginnartut, kuuginnavittut silammut, qanoruna ililluta annikillisarsinnaagigut? Aamma 1 koruuni sunaluunniit peqquteqarnani annissorneqartoq taanna nalilersorneqartariaqarpoq, Kim Kielsen oqarpoq.

Taassuma qineqqusaarnermi oqaatigaa aalisartoq 20 koruunimik iluanaaruteqartartoq naak nipitsat suaat 400 koruunilerlugit Danmarkimi pisiniarfinni akiginiarneqartartut. Taamaammat misissuisitsilernissaq pissusissamisoortippaa.

- Taannartaajuna ingerlaarnga, aningaasat suna tamaat naliitsusarnera, misissorneqartariaqartoq.

Kim Kielsenip taama ujartuinera sulisitsisut peqatigiiffiannit GA-miit  ilassilluarneqarpoq.

Aamma atuaruk GA: Kielsenip qinersisartut nipisat suaat pillugit salluliuuppai

- Kimip nammineerluna eqqaavaa taamaattuliortoqarsinnaasoq, aap. Misilittagaqarfigineqarpoq taamatut misissuisoqarsinnaavoq, Kalaallit Nunaanniuna tunisassioriaatsit qanoq isikkoqartut, GA-mi siunnersorti Bent Sørensen oqarpoq.

Tunisinermili akit piniarfinnilu akit sanileriisinneqarsinnaanngitsut, GA-mit tikuarpaat. Tamatumani pisisartut apeqqutaalluinnartartut aammalu tunisassiat pisiniarfinnut apuutsikkiartorneranni assigiinngitsunik aningaasartuuteqarfiusarluni.

- Tunisassiortut apeqqutaatittarpaat tuniniaaffiit qanoq piumasaqarnersut taamaalillugulu akiit assigiinngilluinnaqqissaarsinnaallutik. Saniatigut aamma aalisarnerit pineqartut qanoq nunarsuup sinneranut inissisimanersoq, taakku aamma nipilersoqataasarput akit allanngorarsinnaanerannut, Bent Sørensen oqarpoq.