MISISSORPARPUT GA: Kielsenip qinersisartut nipisat suaat pillugit salluliuuppai
Siumup siulittaasuata Kim Kielsenip Qaqortumi tv-kkut aallakaatinneqartumik ataasinngormat qineqqusaartoqarmat 20 koruuni 400 koruunillu assersuutigalugit takutippai.
Aalisartut nipisat suaannik tunisaminnut 20 koruuniinnarnik akilerneqartarnerat, ullullu pingasut qaangiutiinnartut tunisaasa Danmarkimi 400 koruunilerlugit tunineqartarnerat naleqqutinngitsuliornertut taakkartorpaa.
- Taamatut oqalunneq tunngavissaqaranilu eqqunngilluinnarpoq. Paarlattuanilli avammut tunisassiortut nipisat suaannik tunisassiornermi 2013-imi annertuupilussuarmik amigartooruteqarsimannerannut uppernarsaatissaqarpoq.
2014-imi angusat suli inaarutaasumik naatsorsorneqanngillat, kiilumulli 400 koruuneqarnerannik oqalunneq asuli oqalunneruvoq, Sulisitsisut peqatigiiffianni siunnersorti Bent Sørensen taama oqarpoq.
Bent Sørensenip erseqqissaatigaa nipisat suaat nutaajutillugit Danmarkimi akisuupilussuanngorlugit nioqqutigineqartartut tassaammata aalisakkanit danskit imartaanni pisanersuut Danmarkimiillu kilometerinik 2.500-nik ungasitsigumi Kalaallit Nunaata imartaaneersuunatik.
- Aalisarnerup iluani tunisassiornikkut inuussutissarsiutitigut ineriartortitsiffiusut assigiinngitsut toqqaannartumik suliniuteqarfiginissaat pingaaruteqartupilussuuvoq.
- Aajuku 400 koruunik aajunalu 20 koruuni aalisartup nipisat suaannut kiilumut pissariarisartagaa. Ullullu pingasut qaangiukkaangata Danmarkimi 400 koruunilerlugu tunineqartarpoq. Tamanna killormut saatsinneqartariaqarpoq. Aningaasat taakku Nunatsinni pisariaqartippagut, Kim Kielsen ataasinngormat unnukkut qineqqusaarneq aallartinneqarmat taama oqarpoq.
Kim Kielsenip aalisarnermik inuussutissarsiornerup iluani akit pilertarneri niuernikkullu atugassarititaasut pillugit taama ilisimasakitsiginera, aalisarnerullu iluani suliffeqarfinnut minnerunngitsumillu Namminersorlutik Oqartussanit pigineqartumut Royal Greenlandimut taama tatigisaqanngitsiginera siunnersortip tupaallaatiginerarpaa.
