Politikki

IA isumasiuinermi nutaami aamma siuariartussatut isikkoqartoq

Qinersisartunik isumasiuineq nutaaq, HS-Analysemit suliarineqartoq, ullunilu novembarip 14-ianit 16-ianut apersuinernik 1091-inik tunngaveqartoq aviisip Sermitsiap ullumi saqqummiuppaa.

Allattoq Karsten Sommer

novembarip 21-at 2014 10:07

Isumasiuineq Epinionip KNR-illu pingasunngormat isumasiuiunerannit nikingassuteqalaaginnarluni assinganik tikkuussivoq.

HS-Analaysep isumasiuinerani Inuit Ataqatigiit 38,5 procentinit qinerneqarluni partiit anginersarilissavaat, Siumullu 34,5 procentinit qinerneqartussatut naatsorsuutigineqarluni.

Aamma atuaruk IA partiit anginersarilissavaat

Epinionip isumasiuineranut naleqqiullugu Siumut taamaasilluni IA-mut qaninneruvoq. Qinersisartut Siumup pissarsiarisai Partii Naleqqaminngaanneernerupput, isumasiuinermi nutaami 10,8 procentinit taanna qinerneqarpoq, Epinionip isumasiuinerani 14,8-nit qinerneqarluni.

Demokraatit 9,2 procentinit qinerneqarput, Epinionip isumasiuinerata assiffaaringajaanik. Tamannalu Atassummut aamma atuuppoq, taannami Sermitsiap isumasiuisitsinerani 6 procentinit qinerneqarmat.

Partii Inuit isumasiuinermi pingasunngormat saqqummiunneqartumi qinersinermi angusaqarluannginnissaa siulittuutigineqarpoq, tamannalu aamma misissuinermi nutaami uppernarsarneqarpoq, partiimi 1,2 procentiinnarnit qinerneqarmat.

Epinionip misissuineranituulli HS-Analysep partiit mikinerit aalajangiisuusussaassangatippai, IA Siumullu suleqatigiilissanngippata, taakkumi Inatsisartunut ilaasortanit 31-iusunit inissat 23-t pissarsiarissammatigit.