GIF aamma Naalakkersuisut: Timersorluni unammiuaarnerit amerlanerusariaqarput
Timersortartut suli unamminerusariaqarsorineqarput.
Ukioq timersorfiusoq ilivitsoq sapaatip akunnerinnaanik unamminertalik pisoqalivoq ullutsinnullu naleqqunnerusumik unammeriaatsimik taarserneqartariaqarluni.
Timersortartut kattuffiisa aamma timersornermut Naalakkersuisup Peter P. Olsenip isumasioqatigiinnerannit eqikkaanerit ilaat taamaappoq.
- Ukiumut ataasiarluta pissartanngorniulluta naapittarpugut pissartanngorniutereeraangattalu ukiup sinnera naapeqqissanata, Peter P. Olsen KNR-mut naqissusiivoq.
- Unamminerit amerlanerulernissaannut piffissanngorpoq aamma nunanut allanut unammisartuvut ineriartoqqissappata, Peter P. Olsen oqarpoq.
Elite Sport Greenland, GIF aamma namminersorlutik oqartussat pitsaaliuinermut immikkoortoqarfiat Paarisa peqataasut unamminerit amerlisinnaanerat ilassilluarpaat.
- Ilaatigut eqqartorparput GMip saniatigut pikkorinnerit sisamat unammiuaarsinnaanerat final fourimik taallugu. Taamaasilluni GM kisiat isumalluutiginagu soorlu ukiakkut aamma unammisoqarsinnaagaluarmat, GIFmi siulittaasoq Nuka Kleemann oqarpoq.
Aningaasartuutit amerlanerit
Peqataasut aamma ilisimaaraat angalanerulertoqassappat aningaasartuutit amerlissasut.
Nuka Kleemann KNR-mut nassuiaavoq tapiissutit 60 procentii angullugit angalanerinnarmut atorneqartartut.
Allatut oqaatigalugu angalanerulertoqassappat aningaasanik pissarseqqittoqartariarpoq aamma nunanut allanut unammisartut angalanerunissaat kissaatigineqarmat.
- Timersornermi aaqqissuussat amerlisinnaaneranut aningaasaqarniarneq aporfiit annersarinnguatsiarpaat, Peter P. Olsen oqarpoq.
- Isumasioqatigiinnermi isumaqatigiissutigaarput tamatta akisussaaffimmik tigusisariaqartut assersuutigalugu suut tamaasa Naalakkersuisunut isumagisassanngortinnagit. Aamma namminersorlutik oqartussat suliffeqarfiutaat timersornermik kivitseqataanissamut peqataanerusariaqartut. Air Greenland aamma saaffigissavarput taakku aamma timersornermut suli kivitseqataanerunissamut kajumissaarlugit, Peter P. Olsen oqarpoq, oqaatigisinnaannginnerarpaali qaqugu unammiuaarnerit amerlanerulersinnaanersut.
GIF aamma namminersorlutik oqartussat naammassisaqarnissamut isumaqatigiissummik nutarterissallutik maanna oqaloqatigiipput taannalu 2022-miit nutartereerluni atuutilertussaavoq.