Gazami innaallagiaaruttoqareersorlu napparsimmaviit atorneqarsinnaajunnaaratarsinnaasut
Gazami pingasunngornermi innaallagiaaruttoqareersorlu orsussamik aamma amigaateqartoqalertoq, ikiuiniaqatigiiffiit arlallit nutaarsiassaqartitsivimmut Al Jazeeramut ilisimatitsipput.
Peqqinnissaqarfimmi sulisut orsussamik, innaallagissamik, inuussutissanik, pisariaqartitanillu allanik pissarsisinnaanngikkunik sulisinnaanertik killeqarluinnalissasoq, nakorsat killeqarfeqaratik sulisut ikiuiniaqatigiiffianneersut oqaatigaat.
Gazami innaallagissiorfituaq orsussaarummat pingasunngornermi atorneqarsinnnaajunnaartoq, Gazami nukissiuuteqarnikkut oqartussat ilisimatitsipput.
Hamas Israelimik arfininngormat ullaakkut saassussimmat, Israel Gazamik sutigut tamatigut mattussereersorlu taama pisoqarpoq.
Israelimiut sallunaveeqqutitut Hamasimit Gazami tigummineqartut aatsaat iperagaappata Gaza innaallagissamik imermillu pilersorneqaqqilissaaq.
Israelip nukissiuuteqarnermut ministeria taama allappoq.
Gaza innaallagiaaruppat tamanna innuttaasunut kingunipiloqarsinnaasoq, nunani ikiuiniaqatigiiffik International Røde Kors naliliivoq.
Tuluit aviisiisa ilaat The Guardian taama allappoq.
Gazami qitiusumik napparsimmaviup orsussamaatai ullunut sisamanut naammakkunartut, ikiuiniaqatigiiffiit arlallit tuluit tv-qarfiannut BBC-mut nalilerpaat.