Gaza akunnialuit ingerlaneranni innaallagiaqarunnaassaaq

Gazami innaallagissiorfituaq pingasunngornerup ingerlanerani orsussaaruttussatut isikkoqarpoq. Palæstiinamiut nukissiuuteqarnikkut oqartussaasui taama ilisimatitsipput.

Tamanna akunnerit qulit aqqneq-marlullu tulliuttut ingerlaneranni pinissaa ilimagigitsik, oqartussat siuttuata Thafer Melhemip pingasunngornermi ullaakkut oqaatigaa.

Taamaalippat Gazami innaallagissamik pilersuineerussasoq nalunaarutigineqarpoq.

Israelip Gaza sutigut tamatigut mattunniarpaa, innaallagissamillu pilersuinerup matuneqarnissaa tassunga ilaalluni.

Hamasip Israelimi aattaqaqisumik saassussineranut tamanna akiniaaneruvoq.

Gazami innaallagissamik pilersuineq akunnialunnguit ingerlaneranni unikkumaartoq Gazami aqutsisut Hamasimeersut pingasunngornermi ilisimatitsissutigaat.

- Gazami sullissinerit tamarmik innaallagiaqarnissaanik pisariaqartitsipput, assersuutigalugulu generatorit atorlugit ilaannakortumilluunniit pilersuisoqarsinnaanngilaq, orsussamimmi pilersuineq aamma eqqorneqarmat, CNN allappoq.

Gazami innaallagissiorfik tamaani ualikkut nalunaaqutaq marlunut atorneqarsinnaajunnaassasoq, Gazami nukissiuuteqarnermi oqartussat siuttuata Jalal Ismailip BBC naapertorlugu oqaatigaa, tassa nunatta nalunaaqutaa naapertorlugu ullaaq manna qulingiluanut.

Islamisiortut Hamas Israelimik arfininngornermi ullaakkut saassussilerpoq. Inuit ikinnerpaamik 1200-t Israelimi toqutaasimapput.