Hamasimeersut toqutaasimasut 1500-t missaat Israelimi nassaarineqartut
Islamisiortut Hamasimeersut toqutaasimasut 1500-t missaat Israelimi nassaarineqarsimapput. Hamasip Israel arfininngornermiilli saassutarilerpaa.
Israelimi illersornissaqarfiup oqaaseqartitaa taama ilisimatitsivoq.
Hamasip Israel arfininngormat saassutarilerpaa. Raketinik Israelip tungaanut igeriussisoqarnerata saniatigut sorsukkumatuut Hamasimeersut Gazamit Israelimut isaalerput.
Gazamut killeqarfiup nalaani nipilersornermik festivali tassani saassunneqarpoq, festivalertullu ilaat aallarunneqarlutik. Hamasip illoqarfiit arlalit kibbutzillu aamma saassuppaat.
Hamasip inuit 100-nit ikinnerunngitsut Israelimit Gazamut aallaruppai.
Israelip Hamasip saassussinera akiniarpaa Gazamillu saassussilluni. Ataasinngornerup marlunngornerullu akornanni unnuakkut saassussinermi sumiiffiit assigiinngitsut 200-t Gazami eqqorneqarput. Israelip sakkutuui timmisartortartut, inoqatinut attaveqaqatigiittarfikkut X-ikkut, Twitteritut siornatigut ilisimaneqartukkut taama ilisimatitsipput.
