Siuariartornissaq Future Greenlandimi sammineqassaaq

Inuussutissarsiorneq pillugu ataatsimeersuarneq, Future Greenland, ullumi aallartippoq.

Inuiaqatigiit aningasaqarnikkut siuariartorneruleqqullugit inuussutissarsiortut eqqortunik sinaakkusersorneqartariaqarnerat ulluni marlunni tulliuttuni ataatsimeersuarnermi ukkatarineqassaaq.  

Pingaarnertut oqalugiartussat ilagaat qallunaaq EU-kommissæri, Margrethe Vestager, inuussutissarsiutinut politikkimik pilersitsineq ingerlatsinerlu oqaluuserissallugit.

Danmarkimi aviisip inuussutissarsiornermik sammisaqartup Børsenip aaqqissuisuunerata, Anders Krab-Johansen, inuiaqatigiit aningaasaqarnikkut qanoq ilillutik siuariartorsinnaanerat oqalugiaatigissavaa.

Nunatsinnut piumasaqaatit

Taava aamma The Sentient Groupimeersup Angelina Methap aningaasaliisartut aningaasaatillillu sunik nunatsinnut piumasaqaateqarnerannik oqaluttuassaaq.

Taassuma sullivigisaa Cayman Islandimit inissisimasuuvoq, nunarsuarmilu tamarmik aatsitassarsiornerni aningaasaliisarnermik immikkut suliaqartuulluni.

Nunatsinneersunut qiviarutta, aamma aalisarnermut piniarnermullu naalakkersuisoq, Karl-Kristian Kruse takorluukkat iluarsaaqqinneriillu pillugit oqalugiassaaq, taava Demokratineersup Randi Vestergaard Evaldsenip inuiaqaatigiit aningaasaqarnikkut siuariartorsinnaanerat attugarissaarnerlu politikkikkut qanoq oqimaaqatigiissaartinneqarsinnaanersut oqaluuserissavaa.

Aamma ullup ingerlanerani ikinnerusukkaarluni oqallittoqassaaq, ilaatigut politikkikkut oqallisigineqartunik kikkut aallartitsisuusarnersut, aamma nunatsinni illoqarfissuarnut nussorneq qanoq pissuseqarfigineqartariaqarnersoq oqaluuserineqassallutik.

Ataatsimeersuarneq naggaserlugu Grønlandsbankenip Inuussutissarsiornermut Aningaasaateqarfiata aallartitsisumut nersornaat tunniutissavaa.

Sulisitsisut Future Greenlandiimik 2009-miilli ukioq allortarlugu aaqqissuussisarpoq,  unali aaqqissuussat tallimassaraat.