Frederik Lundblad GIF-mi siulittaasussarsiornermi aamma qinigassanngortippoq
GIF-mi siulittaasussarsiornissamut ikinnerpaamik marluk qinigassanngortipput.
Sisorartartut kattuffiata Frederik Lundblad GIF-mi siulittaasussatut qinigassanngortippaa. Taanna ukiorpassuarni Aasianni Nuummilu peqatigiiffilerinermik suliaqarpoq. Aamma Sisorartartut kattuffiata ataani sisoraatinik oqilaniunnermut ataatsimiititaliami suleqataavoq aammalu Sisorartartut kattuffianni siulersuisuni aamma ilaasortaareerluni.
- Tassa nalunaarutiginikuuarput Sisorartartut kattuffiat tunuliaqutaralugu siulittaasussarsiornermut qinigassanngortittunga, Frederik Lundblad KNR-mut oqarpoq.
Aallartitat GIF-mi ileqquusumik oktoberip 20-at ataatsimeersualerpata siulittaasumik nutaamik qinersisoqartussaavoq.
GIF-mi siulittaasuugallartoq Bolethe Stenskov siulittaasutut qinigassanngortinngilaq ippassarlu sisamangornermi Claus Nielsenip qinigassanngortinnini KNR-mi saqqummiuppaa.
Eqqarsaatigereerpaa
Frederik Lundbladip qinigassanngortinnissani piffissami sivisujaami isumaliutigisimavaa aammalu kattuffinnut attaveqartarluni.
- Qinigassanngortinnissara ukiorli isumaliutigaara aammalu tamatuma tapersersorneqarnera tusarniarsimallugu, Frederik Lundblad oqarpoq.
Qinigassanngortinnini GIF-mut nalunaarutigereerpaa aammalu sulissutigerusutani siammarterlugit.
Angisuumik eqqarsarta
Frederik Lundbladip ilaatigut kissaatigaa kommunenik namminersorlutillu oqartussanik suleqateqarnerup nukittorsarneqarnissaa.
- Anguniarparput ukioq 2030-mi nunarsuarmi timimik aallatitsinerpaanngornissaq. Tamanna kinguneqartinneqartariaqarpoq malitseqartinneqarlunilu, Frederik Lundblad oqarpoq.
- Suliniutit annikitsut naammagiinnarsinnaanngilagut. Angisuumik eqqarsartariaqarpugut.
Suleriusissallu ilaattut kommunenik suleqateqarneq piukkuppaa:
- Kommunet suleqataanissartik oqaasiinnartigut ilimasaarutigereerpaat ilaallu aamma aallartereerlutik. Kommunelli tamaasa suleqatigilertariaqarpagut aamma timersorfissat eqqarsaatigalugit sanaartornissamik pilersaaruteqartariaqarluta, Frederik Lundblad oqarpoq, aammalu namminersorlutik oqartussanik partiinilu qanimut suleqateqarusulluni.
Pingaartilluinnagaasa ilagaat kattuffiit akornanni suleqatigiinneq.
- Aamma kattuffiit ingerlanneqarnerannut sakkussalersuilluarnissaq pingaarteqarluinnarpoq kattuffiit peqatigiiffiillu nittarsaanneqarnissaannut amerlanerusunik ilaasortassarsiornissaq siunertaralugu, Frederik Lundblad oqarpoq.
Frederik Lundbladip aamma timersornermi kattuffinni arnat suleqaanerunissaat ujartorpaa.
- Arnat allaanerusumik pissutsinik isiginneriaaseqarsinnaapput. Pisut sammivinnit assigiinngitsuniit isinnissaannut iluaqutigikuttoorsinnaavagut, Frederik Lundblad oqarpoq.
