Claus Nielsen GIF-mi siulittaasussarsiornermi qinigassanngortippoq
GIF-mi siulittaasuugallartoq Bolethe Stenskov GIF-imi oktobarip 20-ani siulittaasumik qinersisoqalerpat sassarnianngilaq. Taamaasilluni timersornermi Nunatsinni kattuffimmi nutaamik siulittaasussarsiortoqartussanngorpoq.
Qinigassanngortittoq siulleq maanna sassarpoq. Taanna tassaavoq Claus Nielsen siornatigut GIF-mi allattaaneq maannalu siulersuisuni ilaasortaq. Taanna timersornermi siulersuunermi sungiusaasuunermilu ukiut 40-t sinnerlugit suleqataavoq inunngorfimmini Qaqortumi K-33 aallartiffigalugu.
- GIF-mi siulittaasussarsiornissamut qinigassanngortippunga, Claus Nielsen KNR-mut oqarpoq.
Siulittaasussarsiornissamut qinigassanngortinnissamut killisarititaasoq tassaavoq septembarip 20-at maannamuugallartorlu allanik KNRip tusarfii malillugit.qinigassanngortittoqanngilaq
Ukiuni qulikkaani marlunni GIF-mi siulittaasoq Nuka Kleemann upernaaq tunuarpoq kultureqarnermut, ilinniartitaanermut, ilisimatusarnermut ilageeqarnermullu naalakkersuisoqarfimmi pisortanngorami tassanilu oqartussaaffigineqartunut timersorneq ilaavoq.
Taamanerniit siulittaasuugallartoq Bolethe Stenskov GIF-mi siulittaasussarsiornissamut sassarnianngilaq.
Arctic Sports Greenland qanittukkut ataatsimeersuareermat nalunaarutigineqarpoq GIF-mi oktobarip 20-ani siulittaasumik qinersisoqareerpat Arctic Sports Greenlandimi siulittaasutut Bolethe Stenskov inisseqqikkumaartoq.
Eqqarsaat nutaajunngilaq
Claus Nielsen qinigassanngortinnissani sioqqullugu kattuffiit aamma GIFip siulersuisuisa taperserniarneraanni misissuivoq.
- Siulittaasumut qinigassanngortinnissamut eqqarsaat qaammatit arlallit pigivara. Taamaattoq allamik qinigassanngortittoqassamaarnersoq utaqqimaaqqaareerlugu aalajangerpunga, Claus Nielsen oqarpoq.
- Kattuffiit arlaqartut aamma GIF-mi siulersuisut siulittaasunngorniarnera taperserpaat, oqaatsini ilavai.
Siulittaasunngorniarnermini suliniutigerusutani pillugit kattuffiit tamaasa mailimik nassereerpai.
- Timersorneq inuunerivara. GIF-mi siulersuisuni peqataareerpunga aamma sulisooreerlunga. Taamaattumik suliassat nalunngilluarpakka, Claus Nielsen oqarpoq.
- Kisianni suliassarpassuaqarpoq. Timersorneq tamakkiisumik sullittussaavarput timersuutit ataasiakkaaginnaat pinnagit. Nammineq piumassutsimik suliniarneq pingaartitassaraarput aamma kommunet namminersorlutillu oqartussat attavigisarnerisigut timersortarfeqarneq illoqarfinni nunaqarfinnilu siuarsartussaallugu, Claus Nielsen suliniutigerusutami ilai pillugit oqarpoq.
