GIF nutaamik siulittaasutaassaaq
Nuka Kleemann ilinniartitaanermut, kultureqarnermut, timersornermut ilageeqarnermullu naalakkersuisoqarfimmi junip aallaqqaataani pisortanngussaaq.
Taanna aamma Kalaallit Nunanni timersoqatigiit kattuffianni GIF-mi siulittaasuuvoq naalakkersuisoqarfimmit pisortaaffigiligassaminit tapiiffigineqartartumi.
- Atorfimmut qinnuteqarama nalunngilluarpara timersorneq naalakkersuisoqarfiup taassuma ataaniittoq. Aamma aalajangiutereernikuuara atorfinissaguma GIF-miit tunuarniarlunga, Nuka Kleemann KNR-mut oqarpoq.
Atorfigiligassamini junip aallaqqaataa sulilissaaq, taamaattorli GIF-mi siulittaasutut ukiamut inissisimagallassalluni.
- Naalakkersuisuni ilaasortaq sullitassara oqaloqatigereerpata torersumik GIF-mi suliat ingerlareersut naammasserusullugit, Nuka Kleemann oqarpoq.
- Taamaattumik ileqquusumik oktoberimi GIF-mi ataatsimeersuartoqalerpat tunuarumaarpunga, Nuka Kleemann oqarpoq.
Kina siulittaasunngussava?
Nuka Kleemannip GIF-mi siulittaasutut qinigaaffia ukioq manna naasussaavoq siulittaasorlu nutaaq ukiuni sisamani tullerni atuuttussaq qinerneqartussaalluni.
- Atorfittaartussanngorninni inissisimaffik atuutilersoq siulersuisuni suli eqqartunngilarput. Qularnanngilarli maajimi ataatsimiilerutta tamanna eqqartorumaaripput, Nuka Kleemann oqarpoq.
- Tulluarnerussaaq kattuffiit ilaasortat ileqquusumik ataatsimeersuarnermi taasisinnaasut kina siulittaasorerusunnerlugu piffissaqarluarlutik eqqarsarfissinneqartuuppata, Nuka Kleemann oqarpoq.
Taanna GIF-mi siulittaasuusartuni sivisunerpaamik siulittaasuuvoq. Tatigisaalluni inissisimaffik taanna 2003-mili inissisimaffigivaa.
