Sisoraaserluni ooqattaasarneq: Inuusuttuaqqat Europami pissartanngorniunneranni Sondre Slettemark sølvinnappoq

Kalaaleq sisoraaserluni ooqattaasartartoq Sondre Slettemark sølvinnappoq inuusuttuaqqat Europami pissartanngorniunnerat sapaatiummat januarip 26-at Tysklandimi sisorartarfimmi Altenbergimi naammassimmat.

Unamminerit naggaserlugit ataatsikkut aallarluni 12 kilometerimut unammisoqarpoq sisamariarluni ooqattaasanermi katillugit 20-riarluni seqqortoqarluni.

Ooqattaasarnermi siullermi Sondre Slettemark ataasiarluni unioreerluni ooqattaasarnermi kingullermi ataasiarluni unioqqippoq. Polenimeersoq Grzegorz Galica sekundinik arfineq pingasuinnarnik siulliulaarluni ajugaavoq kalaaleq piukkunnaateqarluartoq tullersortigalugu.

- Assut iluarpoq unamminermi kingullermi unammilluarama unammersuarnermi tassani unamminerit siuliini marlunni naammaannartumik angusaqartareerluni, Sondre Slettemark oqarpoq.

- Sølvinnannera assut naammagisimaarpara. Naak sekundinik arfineq pingasuinnarnik kulti inorsarfigilaaraluarlugu assut naammagisimaarinnippunga, Sondre Slettemark oqarpoq.

Uniorneq sunniuteqaqisoq

Ooqattaasarnermi siullermi ataatsiarluni uniornermigut Polenimiup ajugaasup saniatigut franskit Sloveniamiorlu pikkunartumik unammeqatigivai.

Kingullermik ooqattaasartussanngoramik Sondre Slettemark sekundinik 22-nik siuartuugaluarpoq, ataasiarlunili uniorami malinnitsiminit qanillineqarpoq. Polenimiullu Sondre Slettemark tassani qaangerpaa.

- Tamatuma kingorna suli pissanganartorujussuuvoq takulerakkit franskit Sloveniamiorlu malinnnittut. Kulti annaareeraluarlugu ujaminnannissara anguniarlugu assut tamaviaarpunga, Sondre Slettemark oqarpoq.

Erfalasorput angisooq nassarsimavaat taannalu ujaminnakkiartorluni qaqinermini tulluusimaarluni nassarpaa.

Sondre Slettemark maanna Italiamiippoq sapaatip akunnerata tulliani inersimasut unamminerat IBU Cup peqataaffigiartorlugu.