Ikinngutigiikkunnaalertut: Fredericia Kommunep Ilulissat akissaqartikkunnaaraa

Illoqarfiit ikinngutigiit Ilulissat Fredericialu ukiut 50-it sinnerlugit suleqatigiipput.

Danmarkimi sapaatit akunnerni arfineq-marlunni atuarnissaq Ilulissani 5. klassertunut tamanut ukiut tamaasa 1969-imili neqeroorutaasarpoq.

Neqeroorutaajunnaassagunavillunili.

- Neqeroorutaajunnaassaneranik ilimasaarneqanngilagut. Sipaarniutinut ilanngunneqariasaarpugut, tassa suleqatigiikkunnaartussanngoriasaarpugut.

Fredericia Kommunep Kalaallit Nunaat pillugu ataatsimiititaliaata siulittaasua, John Bech Hansen, taama oqarpoq.  

Tassa Fredericia Kommunea sipaarniarpoq, tamannalu Kalaallit Nunaat pillugu ataatsimiititaliaqarunnaarneranik kinguneqassagunavippoq.

Kalaallit Nunaat pillugu ataatsimiititaliaqarunnaalersaartoq, missingersuutissatut siunnersuummi akuerisassatut kommunimut nassiunneqareertallaqqavoq. Tassa kommuni Kalaallit Nunaat pillugu ataatsimiititaliamik atorunnaarsitsinermini ukiumut 245.000 koruuninik sipaaruteqarfigisassavaa.

Kommunili tamatumunnga ukiumut taama amerlatigisunik sipaaruteqaleraluarluni aningaasaqarnikkut inissisimanera patajaannerulernavianngitsoq, Kalaallit Nunaat pillugu ataatsimiititaliap siulittaasua oqarpoq.

- Quianaannarporluunniit. Sipaarutigisartagassaami allaffeqarfissuarmini ataatsimiinnerni kaffimut aningaasartuutigisartagaanit amerlaneroqqajanngillat, John Bech Hansen oqarpoq.

John Bech Hansen Kalaallit Nunaat pillugu ataatsimiititaliami ukiuni 25-ngajanni sulivoq. Aamma Avannaata Kommuniata illoqarfiit ikinngutigiit marluk taakku suleqatigiinnerminnik ukiunik 50-inngortorsiornertik malunnartinniarlugu Ilulissat illoqarfittaani issiaviit ilaat ima "John´s bænk - Fredericia"-mik allannilimmik allagartalerpaa.

Tassa Ilulissat meerartaata Fredericiamut atuariartornissamik neqeroorfigineqartarnerat unnersiutiginiarlugu taamaaliorpoq.

Annaasaqaatigingaatsiassagaat

Fredericia Kommunep sipaarniarnera aningaasanngorlugu nalilerneqarsinnaanngitsoq, John Bech Hansen aamma isumaqarpoq.

- Nunanit marlunneersut imminnut 5000 kilometerit sinnerlugit ungasitsigisut ikinngutigiilertarput. Kalaallit meerartaat 3000-nit ikinnerunngitsut Danmarkimut Fredericiamut atuariartornikuupput. Sipaarnialeriataarneralu kinguneqanngitsoornavianngilaq, siulittaasoq oqarpoq.

Illoqarfiimmi ikinngutigiit marluk taakku ukiuni 54-ini suleqatigiinnerat nuannersorpassuartaqarpoq.

- Kulturikkut, oqaatsitigut ilinniarnikkullu annaasaqaatigingaatsiartussaassavaat. Meeqqat ilaqutariillu qallunaat kalaallit atuariartortut najugaqarfigisimasaat uani pivakka. Nuanniippoq.

Taakkulu saaffigisinnaasaattut Ilulissani ukiuni 15-ini sulisoq, Inger Degn, isumaqataavoq. Illoqarfiimmi taakku marluk ikinngutigiinnerat meeqqat pissarsiaqaatigisaraat, taanna isumaqarpoq.

- Pissarsiaqartorujussuusarput, soorlu assersuutigalugu oqaatsitigut kulturikkullu ilinniartarput. Qallunaat kulturiat ilinniartarpaat, oqaatsit misigisallu assigiinngitsorpassuit pissarsiarisarpaat, Inger Degn oqarpoq.

Nunatsinnimi ilinniartitaanerup aaqqissuussaanera eqqaagaanni meerartatta qallunaatoorsinnaanissaat suli pisariaqartoq, Inger Degn oqarpoq:

- Ilinniagarniarunik qallunaatoorsinnaasariaqarput, meerartavullu Danmarkimiinnerminni qallunaatut ilikkartorujussuusarput.

Kulturikkut avitseqatigiissaassasut

Fredericia Kommunep sipaarniarnera sulisoqarneranut sunniuteqarnavianngitsoq, Kalaallit Nunaat pillugu ataatsimiititaliaqarunnaarnissamik siunnersuummi allaqqavoq.

Illoqarfiilli ikinngutigiit marluk taakku kulturikkut avitseqatigiittarnerunnaarnerannik kinguneqartussaassasoq arajutsineqanngilaq.

- Siunnersuut akuerineqarpat kalaallit meerartaat Fredericiamut atuariarnissamik neqeroorfigineqassaassapput. Tassa qallunaat kalaallillu meerartaat kulturikkut avitseqatigiissaassapput, siunnersuummi allaqqavoq.

Fredericia Kommuneata borgmesteria aamma Avannaata Kommuniata borgmesteria Palle Jerimiassen (attaviitsoq) ataatsimiigiaqqoreeritik, John Bech Hansen ilisimatitsivoq.

Ataatsimiinnermili sunik eqqartueqatigiissanerlutik, Kalaallit Nunaat pillugu ataatsimiititaliap siulittaasuata oqaatigisinnaanngikkallarpaa.