Ilisimatuutut misissuineq nutaaq: Qimuttoq ilimagisamit suli pisoqaaneroqaaq
Qimmeq qimuttoq ilimagisamit suli pisoqaaneruvoq.
Københavnip Universitetiani Det Sundhedsfaglig Fakultetimit Qimmeq pillugu suliniummi ilisimatuutut misissuinerup tamanna takutippaa. Nunatsinni Ilisimatusarfik, Qimmeq pillugu suliniummi peqataasoq, tusagassiuutinut taama nalunaaruteqarpoq.
Ilisimatuut Sibiriap qeqertaanit Zhokhovimit qimmimit qeqertamut ateqaataasumit DNA atorpaat.
DNA-mit tassannga misissuinerit tunngavigalugit qimmip sananeqaataanik kingornuttakkanik, assigiinngisitaarnerannillu ersersitsisunik, aatsaat taamak pisoqaatigisunik nassaartoqarpoq.
AAMMA ATUARUK Kalaallit qimmii pillugit nutaamik inatsiseqalersinnaassasoq
Sibiriamiut qimmiat, Zhokhov, qimmit nujuitsut siullerpaat ilaanneersuusorineqaraluarpoq qimminullu tamanut ataatsimoorussamik aallaaviusorineqaraluarluni.
Qimmilli qimuttut ullumikkornitsat, soorlu Siberian Huskyp, Alaskan Malamutep kalaallillu qimmiata qimuttup sananeqaataasa kingornuttakkat annertunersaat Zhokhovimeersuusut maanna takutinneqarpoq.
- Tassa imaappoq qimmit qimuttut ullumikkornitsat Zhokhovillu Sibiriamiit ukiut 9.500-meersumik ataatsimoorussaminnik aallaaveqarput. Manna tikillugu isumaqarsimagaluarpugut qimmit qimuttut aallaavii ukiunik 2-3.000-iinnarnik pisoqaassuseqartut, Mikkel Sinding atuakkamik allaatiginnittuni pingaarnerusoq, nalunaarummi oqarpoq.
Qimmit qimuttut ullumikkornisat qangarnisaanerusut
Ilsiiamtuut siberiamiut qimmiannit 33.000-inik pisoqaassusilimmit qimuttuniillu ullumikkornisanit qulinit sananeqaataasa tunngaviinik aamma nassaarput. Sananeqaatit taakku qimminut amaqqunullu nunarsuarmit tamarmeersunut sanilliunneqarput.
- Takusinnaavarput qimmit qimuttut ullumikkornitsat sananeqaataasa kingornuttakkat annertunersaat Zhokhovip sananeqaataaneersuusut. Taamaalillutik qimuttut taakku qimmeq itsarsuarnisaq taanna qimminit amaqquniillu allanit eqqarlerineruaat.
- Tamannalusooq naammanngitsoq – aamma sibiriamiut amaruanit ukiunik 33.000-inik pisoqaassusilimmit akusaanerannit uppernarsaatissanik pissarsivugut – amaqqumillu ullumikkornitsanit akusaaneranut takussutissaqarani, Mikkel Sinding nalunaarummi oqarpoq, nangillunilu:
- Taamaalilluni erserpoq qimmip qimuttut aallaavia siusinnerusumi ilimagisatsinniit pisoqaanipilussuusoq.