Frackingimik taallugu uuliasioriaatsinut pisortaq USA-mi nukissiuuteqarnermut ministerissatut Trumpimit toqqarneqartoq
USA-mi præsidentinngortussap Donald Trumpip, præsidentitut aappaagu januaarip ulluisa 20-anni ivertinneqareernermi kingorna aqutseqatissani inissitsiortuleruttorpai.
Uuliasioriaaseq fracking atorlugu uuliasiortoq Chris Wright, USA-mi nukissiuuteqarnermut ministerinngortussatut Trumpip ippassaq arfininngornermi toqqarpaa. Doald Trump taama ilisimatitsisoq, nutaarsiassaqartitsivik Reuters allappoq.
Chris Wright suliffeqarfimmi Liberty Energymi ullumi pisortaavoq. Suliffeqarfik taanna atortunik uuliasiorfinnut pilersuisarpoq, ikummatissanillu atuisoqarnissaa Chris Wrightip tapersersortorujussuuaa.
Frackingimik taallugu uuliasioriaaseq isornartorsiorneqangaatsiarpoq, taamatummi uuliasiorneq uuliasioriaatsinut allanut naleqqiullugu mingutsitsinerusarmat.
Trumpip ministerissamisut toqqagaasa akornanni amerlasuut Trumpip præsidentitut qineqqusaarneranut aningaaleeqataanikuusut Chris Wright aamma aningaasaleqataanikuuvoq.
Ministerissatut piukkunneqartut senatimi akuersissutigineqaqqaartartussaapput, Wrightilu nukissiuuteqarnermut ministeritut senatimit akuersissutigineqarpat, USA-mi uuliasiortitseqatigiinnut tamanna ajugaanerussaaq, taakkumi Trumpip qineqqusaarnerani tapersersornikuuaat. USA-mi tusagassiorfik Financial Times taama allaaserisaqarpoq.
Uuliasiortoqarnerulerlunilu gassimik qalluisoqarnerulernissaa Trumpip pilersaarutaata Chris Wrightip tapersersussagaa naatsorsuutigineqarpoq.
Kalder klimaaktivister for alarmister
Silap pissusiata allanngoriaortarnerata akiorniarneqarnissaanut sukataaruteqartut ingasattajaartuusut Wrightip oqaatiginikuuaa, nunarsuullu kiatsikkiartornerata akiorniarneqarnissaanut USA-mi demokratit suliniuteqarnerat Sovjetunioniusimasumi kommunistit suleriaasiattut taallugu.
Wright politikkikkut misilittagqanngilaq, ikummatissanillu atuisoqarnerunissaa pillugu allaaserisaqarnikuulluni. Ikummatissanik atuisoqarnerulerpat inuit pissakinnerit aningaasarsiorluarnerulissasut taanna oqarnikuuvoq.
Maanna præsidentiujunnaalersup Joe Bidenip præsidentiunerata nalaani USA-p uuliasiornera aatsaat taama annertutigilerpoq, oqaluttuarisaanermilu nuna ataaseq aatsaat taama uuliasiortigaluni. Nutaarsiassaqartitsivik Reuters taama allappoq.
Ministerissatut piukkussat senatimi akuerineqaqqaartussaapput, Wrightilu ministerissatut akuersissutigineqarpat nukissiuuteqarnermut maanna ministeri Jennifer Granholm kingoraassavaa.
Taassuma nukissiuuteqarnermut ministeriunermi nalaani nukissiuutinik ataavartunik atuisoqarnerunissaa ilaatigut sukataarutigisimavaa.
/ritzau/
