Trumpip Elon Musk ministerinngortissagaa

USA-mi aningaasaatilissuaq Elon Musk, biililiorfimmi Teslami, avataarsualiartitsisarfimmi SpaceX-imi inoqatinullu attaveqaqatigiittarfimmi X-imi pisortaq, USA-mi naalakkersuisut sullissinerisa pitsanngorsaavigineqarnisssaannut ministerinngussaaq.

Præsidentitut qinigaarlaaq Donald Trump tusagassiorfinnut taama nalunaartoq, nutaarsiassaqartitsivik Reuters allappoq.

Elon Muskip Donald Trump præsidentitut qineqqusaarmat tapersersorpaa. Atsiornernik katersuinerni atsioqataasut akornanni makitsinikkut aningaasanik dollarinik millionilikkuutaanik ilaatigut eqquiniaatitsivoq.

Elon Muskip suliffeqarfinnik aallarnisaasoq Vivek Ramaswamy ministereqarfimmi suleqatigissavaa.

Ramaswamy republikanerit sinnerlugit præsidentimut aamma sassaraluarpoq, Donald Trumpimulli ajorsarluni. Naluneqanngitsutut Trump demokratit sinnerlugit præsidentimut qineqqusaartumut Kamala Harrisimut sapaatit akunnerata siuliani ajugaavoq.

Trumpip præsidentinngoruni ministerissatut piukkussami ilaasa allattorsimaffiat marlunngornermi unnukkut saqqummiuppaa.

TV-kkut aallakaatitsisartoq Pete Hegseth taakkununnga ilaasuusoq illersornissamut ministerinngussaaq.

USA-mi naalagaaffimmi South Dakotami maanna guvernøri Kristi Noem, nunami namminermi isumannaallisaanermut ministerinngussaaq.

USA-p naalagaaffiata isertortumik paasiniaasartuini NSA-mi pisortaasimasoq John Ratcliffe, isertortumik paasiniaasartuni CIA-mi pisortanngussaaq. CIA nunanut allanut tunngasunik aallutaqarnerusarpoq.