Folketingip ammaanersiornerani Aleqa, Kim Hansiluunniit peqataanngitsut
Nutarterneqarpoq nal. 11.01: Allaaserisami allaqqaaraluarpugut Sjurdur Skaale Folkletingip ammaanersiorneqarnerani peqataanngitsoq. Tamanna eqqunngilaq, taamaattumillu aallaserisaq iluarsineqarpoq.
Folketingimi Sivisunerpaamik ilaasortaasimasup politikkikkut ukioq nutaaq marlunngornermi nalunaaqutaq ullup qeqqanut ammarlugu tikilluaqqusinerani Kalaallit Nunaat sinnerlugu peqataasussanut issiaviit inniminnerneqarsimasut inoqanngillat.
Atlantikup avannaanit ilaasortat issiaviini Nunatta Qitornaanit, Aleqa Hammond amigaataavoq, taassuma Inatsisartut ukiakkut ataatsimiinnissaannut pingasunngornermut kinguartinneqarsimasumut peqataassalluni Nuummiinnissani toqqarsimavaa. Partiiata Folketingimi allattaa, Miki Jensen taama ilisimatitsivoq.
AAMMA ATUARUK Folketingi ullumi ammarnersiorneqarpoq - palasilu illluatungilerneqarluni
Aleqa Hammond taamaalilluni aningaasaqarnermut ministerip, Kristian Jensip danskit naalakkersuisuisa kalaallit mittarfiinut soqutiginninnerat pillugu Folketingimi Kalaallit Nunaannut ataatsimiititaliami pingasunngornermi isumasioqatigiinnissamut aggersagaanerani peqataanngitsoorpoq.
Kunngeqarfik savalimmiormiullu lagtingiat sinnerlugit peqataasut issiavigisaata eqqaani issiavinni Naalakkersuisut siulittaasuat, Kim Kielsen (S) Inatsisartullu siulittaasuat, Hans Enoksen (P) aamma amigaataapput.
Inuit Ataqatigiinnit Aaja Chemnitz Larsen Savalimmiuneersullu Magni Arge aamma Sjurdur Skaale ammaanersiornermi peqataapput.
Folketingimi ukioq nutaaq Folketingimut qinersiviup massuma ingerlanerani ukioq ataatsimiiffiusussaq kingulliuvoq. Ministeriuneq kingusinnerpaamik juunip qeqqani Folketingimut qinersinissamik suaaruteqassaaq.
AAMMA ATUARUK Inatsisartut ukiaanerani ataatsimiinnissaat kinguartinneqartoq
