Folketingimut qinersinermi taasinerit kisinneqarneranni kukkuneq pissutaalluni IA-mi tulleriiaarneq allanngortoq
Inuit Ataqatigiit sinnerlugu qinikkat marluk Naalagaaffiup Sinniisoqarfiata folketingimut qinersinermi nuna tamakkerlugu taasinerit tamaasa kisereeraalu paarlaapput.
Naalagaaffiup Sinniisoqarfiani allaffimmiup Lasse G. Jensenip oqaluttuaraa kisitseqqissaarnermi kukkuneqalaartuaannartoq.
Pineqartumili kukkuneq Kommuneqarfik Sermersuumi taasinernik 300-nit amerlanerulaartunut tunngassuteqarpoq, taasinerillu pineqartut Nivi Rosingimik (IA) taasinerupput.
Valg.gl-imi paasissutissat naapertorlugit, taanna folketingimut qinersinermi 716-init qinerneqarami, Naaja Nathanielsenip (IA) kingorna sinniisussat pingajuattut qinerneqarpoq.
Tamanna kommunini qinersinermi sulisut Naalagaaffiup Sinniisoqarfianut unnukkut sianernerlutik qinersinerit kisinneqarallarnerannik nalunaarutiginninnerannik pissuteqarpoq.
Kommuneqarfik Sermersuumi qinersinermi sulisut ilaata kisitsit 4 allannagu 1 allattoorsimavaa.
Kukkuneq qinersinerup kommunimit aqaguani paasineqapallakkaluarpoq. Naalagaaffiulli Sinniisoqarfiata tupaallatsitsisoqaqqinnginnissaa pillugu, nuna tamakkerlugu taasinernik kisitseqqissaartinnatik avammut nalunaaruteqarumasimanngillat.
IA-mi kukkusoqarsimammat, IA-lu folketingimut ilaasortaatitaqalernissaminut qinigaareermat, kukkuneq ilaasortaatitanik agguataarinermut sunniuteqanngilaq.
Kingoraartissat nutaat
Naalagaaffiup Sinniisoqarfiata taasinernik tamanik misissuinini sisamanngornermi naammassivaa.
Lasse G. Jensenip IA-mi allatsi tamatuma kingorna sianerfigaa. Taasinerimmi 300-t sinnilaarlugit amerlassusillit nalunaarsorneqarsimannginnerat paasineqarmat, Aqqalukkuluk Fontain (IA) Naaja Nathanielsenimut sinniisut aappaatut inissisimajunnaarpoq.
Nivi Rosing Pipaluk Lyngemut (IA), sinniisutut siullertut inissisimaannaffaarittumut tulliulluni sinniisutut maanna inissippoq.
Pipaluk Lyngemut Nivi Rosingimullu taasinerit amerlassusaat, taasinernik kisitseqqissaarnerup kingorna, sisamaannarnik nikingassuteqarput.
Inaarutaasumik akuersisoqarnissaa utaqqineqartoq
Naak qineqqusaarnikut ilisimatinneqareeraluartut, folketingimi qinersinerup inernera pisortatigoortumik suli saqqummiunneqanngilaq.
Naalagaaffiup Sinniisoqarfiata qinersinerup inernera qinersineq pillugu nalunaarsuiffimmut maanna nalunaarsorpaa, nalunaarsuiffillu Nunamut Namminermut Ministereqarfimmut nassiunneqarpoq.
Qinersinermit inernerit pisortatigoortumik uppernarsarneqartinnagit qinersineq pillugu nalunaarsuiffik akuerineqaqqaartariaqarpoq.
