Aaja Chemnitz: Folketingimut ilaasortat nunatsinneersut oqaasissaqarnerusariaqarput
Folketingimut ilaasortat nunatsinneersut, Aleqa Hammondip (NQ) Aaja Chemnitz Larsenillu (IA) imminnut isornartorsiornerat qineqqusaarnermi ersarissupilussuuvoq.
Maannali nipi saamarpalunnerusoq tutsiuppoq – ingammik Aaja Chemnitz Larsen eqqaassagaanni.
Qinigaaqqissaguni folketingimut ilaasortat nunatsinneersut suleqatigiinnissaminnik atsioqatigiissuteqarnissaat sulissutiginiarlugu nalunaarutigaa.
AAMMA ATUARUK Grafik: Det bestemmer Folketinget i Grønland
- Ilaasortat marluusut qaninnerusumik suleqatigiittariaqarput, tamannalu suleqatigiinnissamik isumaqatigiissusiornikkut pisinnaavoq, tusagassiorfinnut nalunaarummi taama allappoq.
- Folketingimut ilaasortat qinikkallu allat kisimiillutik angusaqarsinnaanngillat. Politikkikkut amerlanerussuteqarnikkut angusaqartoqartarpoq, taamaammat nunatta sunniuteqarnerulernissaa angussagaanni politikkikkut sullerinneq, misilittagaqarneq suleqatigiinnerlu pisariaqarput.
Aamma ilaasortat Savalimmiuneersut piumagunik suleqatigiissitat peqataaffiginissaannut tikilluaqqusaapput, Inuit Ataqatigiinneersoq oqarpoq.
Taamaalillunilu Demokraatit siunnersuutigisaat ilalerpaa, taakku Folketingimi Atlantikup avannaani suleqatigiinnik nutaanik pilersitserusullutik nalunaaruteqarmata.
Naalakkersuisut kommunillu ataatsimiinnerinut peqataaffigerusuttoq
2001-imi Folketingimut qinersisoqarnerata kingorna ilaasortat nunatsinneersut Savalimmiuneersullu Folketingimi Atlantikup Avannaani Suleqatigiit pilersippaat.
Atlantikup Avannaani Suleqatigiit pilersinneqarput Savalimmiut Nunattalu namminersulernissaat innuttaasullu Atlantikup avannaamiut Danmarkimi najugaqartut pisinnaatitaaffeqarnerulernissaat siunertarerpiarlugu. Suleqatigiilli 2011-mi qinersinerup kingorna atorunnaarput.
AAMMA ATUARUK Folketingimut 2015-imi qinersinerup kingorna nunatsinnut aalajangersagarpassuit akuersissutigineqarput
Folketingimut ilaasortat nunatsinni politikkikkut sulinermut annertunerusumik peqataatinneqartariaqarput, Aaja Chemnitz Larsen taama isumaqarpoq.
Taamaammat siunnersuutigaa Folketingimut ilaasortat nunatsinneersut suliani attuumassuteqartuni Naalakkersuinikkut Ataqatigiissaarisoqatigiinnut peqataatinneqartalernissaat siunnersuutigaa.
Naalakkersuinikkut Ataqatigiissaarisoqatigiit Naalakkersuisunit borgmesterinillu tallimanit peqataaffigineqarput, nunamilu namminermi pissutsit pillugit suliani annertuuni isumaqatigiissutit tassani oqallisigineqartarput.
