Politikki

Folketingimi politikerit kalaallit savalimmiormiunit suliaqarnerupput

Kalaallit Folketingimut ilaasortat Danmarkimi naalakkersuinikkut savalimmiormiunit suliaqarnerungaarput. Misissuinerup nutaap tamanna takutippaa.

Allattoq Helle Nørrelund Sørensen

februaarip 28-at 2022 05:43

Nutserisoq Per Rosing

Kalaallit Nunaat Folketingimi marluinnarnik ilaasortaatitaqaraluarpoq – kisianni kalaallit folketingimut ilaasortaasut Savalimmiuniit suleqatiminnit suliaqarneroqaat.

Netmediet Altinget taama allappoq. Mette Marie Stæhr Harder-ip Københavns Universitet-imi inatsisilerinermik immikkoortortami tikeraatut ilisimatuussutsikkut misissuisuusup aamma Karlstad Universitetimi statskundskab-imi lektoriusuusup misissuinerata takutippaa, tassa 1953-imiit 2019-imut danskit politikianni Atlantikup avannaanit ilaasortaatitat sulinerannik misissuilluni nalunaarsuinerani tamanna erserpoq.

Misissuinerup takutippaa kalaallit folketingimut ilaasortaatitaat ukiut ingerlaneranni Danmarkimi politikikkut ataatsimiititaliani savalimmiormiut ilaasortaatitaannit marloriaammik amerlanerusuni ilaasortaasarsiamsut – taakkununnga ilaalluni ataatsimiittaliaq pisaaneqarluartoq Udenrigspolitisk Nævn (Nunat allat pillugit ataatsimiititaliaq).

AAMMA ATUARUK Aajap Aki-Matildallu ammaanersiornermi oqalugiarnerminni uku oqaluuseriniarpaat

Aamma kalaallit politikerit danskit ministeriinut amerlanernik apeqquteqartarput Savalimmiunit suleqatiminnit.

Piffissami 2005-2019 kalaallit politikerii 881-inik apeqquteqarsimapput savalimmiormiullu 445-nik.

Apeqqutit sumut tunngasuuneri assigiinngissuteqarput:

- Savalimmiormiut naalagaaffeqatigiinneq pillugu apeqquteqarnerusarput. Kalaallit taamaaliorneq ajorput. Apeqqutigisartagaat tassaapput pisuni aalajangersimasut pillugit politikikkimut apeqqutit. Isumaqarpunga assigiinngissut soqutiginartuusoq, Mette Marie Stæhr Harder Altinget-imut oqarpoq.

Misissuinerup aamma takutippaa kalaallit Folketingimut qinigaasut ataatsimut isigalugu Christiansborgimi savalimmiormiunit najuunnerusartut.

Kisianni ilaaitugt peqqutaasinnaavoq savalimmiormiut folketingimut ilaasortaatitaasa ilarpassui nunaminni Lagtingimut aamma ilaasortaammata.

Massakkut Atlantikup avannaaniiit Folketingimut ilaasortaasut tamarmik aamma Lagtingimut imaluunniit Inatsisartunut ilaasortaanngillat.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.