Aajap Aki-Matildallu ammaanersiornermi oqalugiarnerminni uku oqaluuseriniarpaat
![](/sites/default/files/styles/image_934x467/public/article_images/aabning_af_folketinget.jpg?itok=EJe23vaH)
Ministeriunerup marlunngormat oqalugiarami folketingimi ukioq nutaaq aallartippaa. Partiit sinnerineersut ammaanersiorluni ullumi oqallinnermi oqalugiassapput.
KNR-imit nunatsinnit Folketingimut ilaasortat marluk suna oqaluuseriniarneraat pillugit oqaloqatigaagut.
Oqalugiaatinni pingaarnertut oqaatigerusutat suua?
Aaja Chemnitz Larsen:
- Nunarput maanna ingerlalluartoq oqaatigissallugu pingaartissavara. Taamaammat inuussutissarsiornerup ineriartortinnissaanut tunngatillugu avataanit aningaasaliissutinik qulakkiigaqarnissarput pingaarpoq. Aamma inuiaqatigiit toqqissisimanissaat oqaluuserissavara. Tassami persuttaanerit, imminut toqunnissamik sioorasaarinerit kinguaassiuutitigullu atornerluinerit amerliartortut takusinnaavagut. Tamannalu pitsaasunik aaqqiissutissarsiornissatsinnik pisussaaffiliivoq.
Aki-Matilda Høegh-Dam:
- Oqalugiaatinni eqqaarusutakka amerlagaluaqisut, ullumi aalajangersimavara, pingaarnertut marlunnik eqqaasassaqarlunga, tassaasullu: Danmarkimi kalaallit meeqqaminnik arsaagaasarnerat, taavalu aappaattut nunatsinninngaanniit politikerit Inatsisartunut qinikkat Folketingimi nunarput pillugu inatsisiliortoqarnerani annerusumik peqataatittariaqarneri.
Ukiuni kingullerni suliani suut pingaarnerpaanikuuppat?
Aaja Chemnitz Larsen:
- Politiinut pineqaatissinneqarsimasunullu inissiisarfinni nakkutilliisunut akissarsiagissaarnerunissamik qulakkeerinninneq pingaarpoq. Tamatuma pitsaasumik sunniuteqarnissaa neriuutigaara. Taava aamma nunatta nunanut allanut tunngasunut politikkikkut Issittumi Siunnersoqatigiinni naalagaaffeqatigiiffiullu iluani iliuuseqarnerusinnaalernera pingaarpoq.
Aki-Matilda Høegh-Dam:
- Kalaallit Nunaata ataatsimiititaliaani siulittaasuuffik ukiuni siullerni marlunni ingerlappara. Siuliuttaasuunerma nalaani angusimasagut tulluusimaarutigisagut tassaapput: nunanut allanut tunngasunut oqartussaassusitta annertusarsimanera, politiit pinerluuteqarsimasunullu inissiisarfinni nakkutilliisut akissarsiaasa qaffassimaneri, soorlu aamma eqqarsaatigalugu oqartussaaffiit annerusumik nunatsinniittussat aamma sakkortunerusumik nunatsinninngaanniik oqariartuutigineqarnissaat sulissutigalugit aallartillugit massakkut aamma Inatsisartuninngaanniit siunnersuutissaqartussanngorluta, soorlu aamma meeqqat eqqarsaatigalugit 80 millioninik aningaasaliiffigisimanerput.
Aamma Aaja Chemnitz Larsenip meeqqanik kalaallinik arsaarinnittarneq misissorneqartariaqartutut eqqaavaa. Danskit sullissisut ilaqutariinnik nalilersuigaangamikk kalaallit oqaasiinut kulturiannullu innimiginninnittarnissaat pingaaruteqartoq oqarpoq.
Suliassat suut ukiuni tullerni tulliuttuni pingaarnerpaappat?
Aaja Chemnitz Larsen:
- Meeqqanut illunik pilersitsisariaqarpugut. Meeqqat kinguaassiuutitigut atornerlunneqartut pillugit suliat uppernarsaateqannginneq pissutigalugu unitsinneqartut amerlavallaarput. Meeqqanut illut uppernarsaatinik amerlanernik katersinissamut taavalu meeqqap ilaqutaasallu pitsaanerusumik ikiorneqarsinnaanissaannut periarfissiissapput. Tamanna meeqqap inatsisitigut isumannaatsuuneranik pitsaanerulersitsissaaq.
Aki-Matilda Høegh-Dam:
- Pingaarnertut sulissutiginiakkama ilaat marluk ullumikkut eqqartussavakka. Tassaappullu taakku arsaarinnittarnerit, politikkikkut ilusilersuinissamut inatsisiliornissamullu oqartussaanerulernissaq, imartattalu assingata naammassineqarnissaa. Tamatuma saniatigut saniatigut nunatsinni nunasisunik allamioqarnermullu allaffimmik pilersitsinissaq eqqartussallugu massakkut piffissanngortoq isumaqarpugut. Taavalu inuit pisariaqartitsisut imminnut sullissinnaanerulernissaminnut ikiuinissaq.
Folketingimi ammaanersiorluni oqallinneq uani toqqaannartumik malinnaaffigisinnaavat.