Folketingi ammarpoq: Assit takukkit
- Ilaanigooq Danmarkeqarpoq, nunanik marlunnik naalagaafeqatigineqalersumik. Oqaluttuarluta tamaanga killeqarpoq.
- Kalaallit Nunaata Savalimmiulluunniit siunissaa Danmarkimi aalajangerneqartussaanngilaq. Siunissaminnik aalajangiiffiusussat tassaapput Nuuk aamma Tórshavn.
Statsminister Mette Frederiksen (Socialdemokratiet) Folketingip ukiaanerani ataatsimiinnera ammaanersiorneqarmat ullumi taama oqarpoq.
Christiansborgemi najuupput folketingimi ilaasortaq Inuit Ataqatigiinneersoq Aaja Chemnitz aamma sinniisussaq Siumumeersoq Markus E. Olsen.
Mette Frederiksenip oqaaseqarnermini oqaatigaa, Kalalalit Nunaata Savalimmiullu folktingimi ilaasortaatitai ilitsoqqullugu oqaatsiminnik oqaluttarfimmiit oqalussinnaanngortut – danskisut kingorna aatsaat saqqummiutissagunikku.
- Naalagaaffeqatigiinneq atuutsillugu (...) naligiilluta sulissaagut, nunat pingasut, inuiaat pingasut, naalakkersuisoqatigiit pingasut, aamma oqaatsit pingasut.
- Uani oqaluttarfimmi atorneqarsinnaanngortut.
Aamma Naalakkersuisut siulittaasuat, Muté B. Egede (IA), aamma Inatsisartuni siulittaasunngoqqammersoq, Mimi Karlsen (IA), Folketingip ammarnerani najuuppout.
Folketingip ammaanersiorneqarnerani oqallinneq sisamanngornermi oktobarip tallimaani pissaaq, tassanilu Aaja Chemnitz Markus E. Olsenilu oqalugiarsinnaajumaarput. Markus E. Olsen arleriarluni oqareerput kalaallisut oqaatsini atorumaarlugit.
KNR-imi siusinnerusukkut ilanngutassiarisatsinni oqaluttuaraarput nutserisoqarnermik aaqqissuussaq atorneqarsinnaanngitsoq, inatsisartuni pisarnertulli toqqaannartumik oqalutseqarneq tappavani atorneqarnavianngimmat.
- Uannut iluarnerujussuussagaluarpoq, piffissarujussuaq atornagu, oqalutsip, oqaatsikka toqqaannartumik nutsersinnaasuuppagit, tallimanngormat oqarpoq.
Atlantikup avannaaneersut oqaluttarfimmit oqalussinnaatitaassapput nalinginnaasumik oqalussinnaatitaanerup sivisussusaa sinnerlugu, namminermi oqaatsitik atoriarlugit danskisut aamma saqqummiisassagamik. Nutserisumik atorfinitsitsisinnaanerannik aningaasanik aamma immikoortitsisoqarnikuuvoq. Savalimmiut folketingimi ilaasortaatitai KNR-imut oqarnikuupput, namminneq danskisut oqaatsit atuinnartarumaarlugit.
Markus E. Olsen Aki-Matilda Høegh-Damimut (S) una sapaatit akunnera, tallimanngorneq ilanngullugu, sinniisutut peqataavoq.
