First Nationit arnat British Columbia eqqartuussivilersuunniaraat
Arnat akuersiteqqaarnagit British Columbiami 1973 tikillugu spiralilersorneqarsinnaasimapput. Inatsisip 1973-imut atuuttup The Sexual Sterilisation Actip tamanna aqqutissiuuppaa.
Inatsit 1973-imi atorunnaarsinneqarpoq, spiralilersuisarnerilli unitsinneqaratik.
Canadami nunap inoqqaavisa arnartaasa pinngitsaalisaassumik kinguaassiorsinnaajunnaarsitaasarlutillu naartuersittarnerat arnanik nikassaanerullunilu inuiannik toqoraanerusoq, eqqartussivilersuussinermut allagaatini allassimasoq aviisip Vancouver Sunip allaaseraa.
Arnat pinngitsaalisaassummik British Columbiami naalakkersuisunit kinguaassiorsinnaajunnaarsitaasarsimanerat ammit qalipaataannik assigiinngisitsinerusoq, eqqartuussivilersuussinermi allagaatini allassimavoq.
Canadami nunap inoqqaavisa arnartaasa meerartaarsinnaanissamut pisinnaatitaaffii pinngitsaalisaassummik kinguaassiorsinnaajunnaarsitsisarnikkut sumiginnarneqarput.
Inuuniarnerannut sunniuteqarnerluttarpoq
Nunap inoqqaavisa arnartaat pinngitsaalisaassummik kinguaassiorsinnaajunnaarsitaanermikkut kingunerluuteqarlutillu inuuniarnikkut ajornartorsiuteqalersartut oqaatigineqarpoq, peqqissutsikkut, ilaqutariinni inuuniarnikkut kulturikkullu innarlerneqartarlutik.
Arnat marluk British Columbiami naalakkersuisunik eqqartuussivilersuussisut tassaapput Lorraine Davis, pinngitsaalisaassummik kinguaassiorsinnaajunnaarsitaasimasoq aammalu Stephanie Roy, naak meerartaarusukkaluarluni naartuersissimasoq.
Arnat hunnorujulikkaat eqqartuussivilersuussinermi assigiinngitsutigut peqataassasut, eqqartuussissuserisup Angela Bespflugip aviisimut Vancouver Sunimut oqaatigaa, arnallu tamarmik immikkut 1 aamma 2,5 millionit koruunit akornanni taarsiivigineqarnissartik naatsorsuutigisinnaagaat.