Finlandip NATO-mut ilaasortanngornissaanut qinnuteqarnissamut siunnersuut akuerineqartoq

Finlandip nunat killiit illersoqatigiiffiannut NATO-mut ilaasortanngornissaanut qinnuteqarnissamut siunnersuut Finlandimi inatsisartuni ullumi marlunngornermi taasissutigineqarmat amerlanerussuteqarluartut akuersipput.

188-it siunnersuummut akuersipput, arfineq-pingasullu akerliullutik. Siunnersuutip akuersissutigineqarnissaa naatsorsuutigineqareersimavoq.

Ilaasortanngornissamut qinnuteqaateqarnissaq Finlandimi naalakkersuisunit maanna taava suliarineqassaaq, Finlandillu præsidentiata qinnuteqaat kingorna taava aamma akuersissutigissallugu.

Tamanna akueritiinnagassatut isigineqarpoq. Præsidenti akuersissuteqareerpat Finland NATO-mut ilaasortanngornissamik pisortatigoortumik taava qinnuteqarsinnaassaaq.

AAMMA ATUARUK Sverige NATO-mut ilaasortanngorniarluni aalajangertoq

Sverigep NATO-mut ilaasortanngornissaanut pisortatigoortumik qinnuteqarnissaq, Sverigemi naalakkersuisut ataasinngornermi aalajangerpaat.

NATO-mut ilaasortanngornissamut qinnuteqarnissaq, Sverigep Finlandillu ataatsimoorullugu suliarisimavaat. Qinnuteqaatillu ataatsikkut tunniunneqarumaartut nalunaarutigineqarpoq, tamannalu ungasissorsuanngitsukkut pinissaa ilimagineqarpoq.

Nunat taakku marluk arlaannaannulluunniit attuumassuteqannginnissartik ukiorpassuarni attassimavaat. Ruslandilli Ukrainemik saassussinera peqqutaalluni NATO-mut ilaasortanngornissaq qanilliartorsimalluni. Nunat taakku marluk maanna tassa ilaasortanngornissamut qinnuteqaataat tunniunneqangajalerput.