Danmarkimi ilinniarniartuunngorniarfinni ilinniartitsisut Levendegrønland.dk. nunarput pillugu ilinniartitsinissaminnut isumassarsivigisinnaalerpaat.

Filmit piviusulersaarutit Danmarkimi ilinniarnertuunngorniat nunatsinnik ilisimasaqarnerulernissaannut iluaqutaasinnaasut

Soorlu Sumé nunatsinnilu ulluinnarni inuuneq pillugit piviusulersaarutit Danmarkimi ilinniarnertuunngorniat nunarsuarmi qeqertat annersaat pillugu nittartagaq nutaaq aqqutigalugu ilisimasaqarnerulernissaannut iluaqutaasinnaapput.

Nittartaq Dagensgrønland.dk 2016-imi pilersinneqarpoq, nunarpullu pillugu Danmarkimi meeqqat atuarfiini atuartunut ilinniartitsinermi atortussat tassaniipput, nittartagarlu nutaaq Levendegrønland.dk Danmarkimi ilinniarnertuunngorniat naalagaaffeqatigiinneq pillugu ilisimasaqarnerulernissaannut iluaqutaasinnaasoq pilersinneqaqqammerpoq.

Levendegrønland.dk pillugu paasissutissat piviusut

  • Danmarkimi ilinniarnertuunngornianik ilinniartitsinermi atortussat qallunaatoortut Levendegrønland.dk-mi isiginnaarneqarsinnaapput.
     
  • Filmiliornermi ingerlatsisut, Emile Peronard Ánorâk Filmimeersoq aamma Vibeke Vogel Bullitt Filmimeersoq, nittartakkamik nutaamik pilersitsisuupput,  Københavnimilu Kalaallit Illuutaat suleqatigalugu pilersippaat.
  • Levendegrønland.dk Danmarkip Meeqqanut Ilinniartitaanermullu Ministereqarfiata aningaasanik agguaassisartoqarfianit, Det Danske Filminstitutimit aamma Dronning Margrethep Prins Henrikillu Aningaasaateqarfiannit tapiiffigineqarpoq.

Filmiliornermi ingerlatsisut, Emile Peronard Ánorâk Filmimeersoq aamma Vibeke Vogel Bullitt Filmimeersoq, nittartakkamik nutaamik pilersitsisuupput, taakkualu isumaqarput Danmarkimi inuusuttut nunatsinnik ilisimasaqarnerusariaqartut.

- Kalaalliusugut tamatta misigisarunarpugut Danmarki tassanilu pissutsit ilisimasaqarfigilluarlutigit, Danmarkimiikkaangattali inuusuttut nunatsinnik ilisimasaqarpianngivissut siumortarpavut. Tamannalu iliuuseqarfigineqartariaqarsorisimavarput. Emile Peronard oqarpoq.

Filmit ilinniartitsinermi atorneqarluarsinnaasunik imaqartut

Filimit piviusulersaarutit Levendegrønlandk.dk-mi isiginnaarneqarsinnaasut ukuupput: "Sumé - Mumisitsinerup Nipaa", "Lykkelænder" aamma "Erinisunnerup Kingorna", taakkualu ukiut arfinillit kingulliit ingerlaneranni saqqummersinneqarput.

Filmit taakkua Danmarkimi ilinniarnertuunngorniarfinni qallunaatoornermik, oqaluttuarisaanermik, inuiaqatigiilerinermik tusagassiuutilerinermillu ilinniartitsinermi atorneqarluarsinnaasunik imaqarput.

Filimiliornermi ingerlatsisoq, Emile Peronard, Ánorâk Filmimeersoq levendegrønland.dk-millu pilersitseqaataasoq taama oqaluttuarpoq.

- Isumaqarpunga filmimik isiginnaarneq atuakkanik atuarnermit paasisaqarfiunerusartoq. Takorluuinarnerusinnaasarlunilu timitaliinarnerusinnaasarpoq, namminerlu ilinniarnertuunngorniarnerniit eqqaamavara sammisaq pillugu filmimik isiginnaarneq sammisamik soqutiginninnerulersitsisarlunilu itisiliinarnerusartoq.

Nittartakkamik nutaamik pilersitsisut ilinniartitsinermi atortussat pilersinnissaannut suut atorunikkit qanorlu iliorunik pitsaanerpaajussanersoq paaserusullugu Danmarkimi ilinniarnertuunngorniarfinni ilinniartitsisut nittartakkap nutaap pilersinnissaanut ataatsimeeqateqartarsimapput. 

Filmillu piviusulersaarutit ilinniartitsinermi atortussatut toqqakkat pingasuusut nunatsinni kulturikkut eriagisassanut, kalaallit pillugit pigiliutiinnakkanik isummanut nunatsinnilu illoqarfimmi anginngitsumi ulluinnarni inuunermut tunngasunik imaqarmata nunatsinnik ilisimasaqarnerulernissaannut najoqqutarineqarsinnaalluarput, Emile Peronard erseqqissaavoq.

- Danskerpassuit filmit taakkua pingasuusut soqutiginartorpassuarnik eqqartueqatigiinnissaminnut suliaqarnissaminnullu aammalu takorlooruminaatsittaqisaminnik nunatsinni inuusaasitsinnik paasisimasaqarnerulernissaminnut najoqqutarilluarsinnaavaat.

Ilisimasakitsut amerlaqalutillu ilinniartitsinermi atortussat amigaataaqisut

Misissueqqissaarisarfiup Epinionip 2019-imi misissueqqissaarinerani inernerit takutippaat,  danskit 9. klassemi 3. G-milu atuartut marluugaangata appaata nunarput kalaallillu pillugit apeqqutit pingaarutillit kukkusumik akisarai.

AAMMA ATUARUK ’Kalaallit nukittuujupput, anneruniajuillutik atugartuujullutillu – atornerluisuullutillu’

Tamanna Danmarkip ilinniartitaanermut ministereqarfiata Danmarkimi inuusuttut ilinniarfiini atugassanik ilinniartitsinermi atortussiornissamut 2019-imi aningaasanik immikkoortitsineranik malitseqarpoq. 

- Nunarput pillugu ilinniartitsinerusoqartalernissaa angorusuttorujussuuarput, tamatumunngali ilinniartitsinermi atortussat amigaataaqaat. Taamaattumik nittartagaliatta nutaajusup atorneqarluarumaartoq, tamatumalu kingunerisaanik Danmarkimi ilinniarnertuunngorniat nunatsinnik ilisimasaqarnerulerumaartut qularinngivipparput, Emile Peronard oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat