Filmiliornermut tapiissutit isumaqatigiinngissutaasut

Nunatsinni filmiliortartut aningaasaliffigineqartarnissaat politikkikkut isumaqatigiissutaavoq. Kisiannili aningaasat suminngaanniit pissarsiarineqartassanersut assortuussutaalluni.
Allattoq Mads Ullerup
marsip 07-at 2012 12:40

Dansk Filminstitut-imit kalaallit filmilortartut aningaasanik aamma siunnersorneqartarnissamik tapiiffigineqartarsinnaanersut, Inuit Ataqatigiit folketingimi ilaasortaatitaata, Sara Olsvigip danskit kulurministeriannut, Uffe Elbækimut apeqquteqaatigaa.

Danskit kulturministeriata, februaarip arfernanni akissutaani erserpoq, kulturimut tunngasut akisussaaffiit Nunatta angerlaassuutereermatigit, kalaallit filmiliortartut ataasiinnarmik periarfissaqartut, tassalu kalaallit qallunaanik suleqatissarsiornermikkut Dansk Filminstitut-mit taperneqartarnissaat.

Doris Jakobsen, Siumup folketingimi ilaasortaatitaata tamanna isumaqatigigaa.

- Kulturimut tunngassuteqartut Nunatta akisussaaffigilereerpaat, taamaammallu akerliussooq akisussaaffigilikkagut ingerlanniarlugit Qallunnaat Nunaannut qinnuuloorutigigutsigit.

Kalaallit filmiliortartut aningaasanik amerlanernik siunissami taperneqartarsinnaaneri Doris Jakobsenip isumaqatigaa.

Taamaattumillu Inatsisartunut siunnersuutigilersaarlugu 3 million koruuninik tamatumunnga atugassanik immikkoortitsisoqassasoq.

- Kulturimut akisussaaffik tigunikuullutigu, filmiliornermut tunngasoq aamma tigunikuullutigu, taamaattumik Inatsisartunut siunnersuutiginiarpara taakkununnga 3 million koruunit illuartinneqaratassasut, Doris Jakobsen oqarpoq.

Kulturimut tunngasut Nunatsinni akisussaaffigilereeraluarlutigit, Danmarkimit kalaallit filmiliortartut taperneqartarsinnaanerat ajoqutissaqanngitsoq, Demokraatit Inatsisartunut ilaasortaatitaa, Andreas Uldum oqarpoq.

- Qallunaat kunngeqarfiata suli ataaniikkatta, taamaattumik kulturinut tunngassutilinnut ikorfartoqatigiissinnaasugut isumaqarpunga.
Filmiliortartunut tapiissutit annertusineqarsinnaannerannik siunnersuummut oqalliseqataasinnaalluarluni, Andreas Uldum oqarpoq, taamaattorli taassuma suli neriuutigaa, danskit kulturministeria isummaminik allanngortitsiumaartoq.

- Filmiliortunut Qallunaat tapiisarnertik Kalaallit Nunaannut Savalimmiunullu, kulturministerip attuumassuteqannginneraraluaraa, neriuutigaara taassuma isummaminik allanngortitsiumaartoq.

Demokraatit politikkikkut oqaaseqartartuat, Andreas Uldum taama oqarpoq.