Aftale: Filmilianut kalaallisut Savalimmiormiusullu oqaasertalersukkanut Danmarkimi maanna qinnuteqartoqarsinnaalersoq
Kalaallisut Savalimmiormiusullu oqaasilinnik Danmarkimi filmiliorsinnaanissamut periarfissagissaartoqarnerulissaaq.
Filmiorneq pillugu isumaqatigiissutip nutaap, ukiunut tulliuttunut sisamanut atuuttussa, Folketingimi akuersissutigineqarnerata kingorna tamanna periarfissaalerpoq.
Filmiliat kalaallisut savalimmiormiusullu oqaasertalersukkat immikkoortumi "Filmiliat nunanit allaneersut"-ni maannamut inissisimasimagaluarput, Dansk Film Institut filmiliamut taamaallaat ataatsimut marlunnulluunniit ukiumut aningaasaliisarluni.
Malittarisassarli taanna maanna atorunnaassaaq, filmilianullu kalaallisut savalimmiormiusullu oqaasilinnut killeqanngiusaartumik aningaasaliisoqarsinnaanngussalluni, tassami filmiliortut akornanni pingaarnertut filmiliortoq danskiuppat taama aningaasaliisoqarsinnaanngussalluni.
Danmarkimi filmiliortarneq pillugu inatsit pissutaalluni pingaarnertut filmiliortup Danmarkimeersuunissaa piumasaqaataavoq, inatsimmi taanna Kalaallit Nunaannut Savalimmiunullu atuutinngilaq.
Danmarkip kultureqarnermut ministeria Jakob Engel-Schmidt (M) ima oqarpoq:
- Kalaallit Nunaanni Savalimmiunilu filmiliortarnerit saqqumilaarnerujartuinnarnerannut tamanna iluaqutaassaaq, Naalagaaffeqatigiinnut iluaqutaassalluni. Oqaluttuassanik nukittuunik peqarpoq, paasisimasaqarnerulersitsissallutillu, Jakob Engel-Schmidt oqarpoq.
Atlantikup Avannaanit Folketingimut ilaasortat isumaqatigiissut nutaaq aamma nersualaarpaat, soorlu aamma Film.gl-ip siulittaasuata Klaus Georg Hansenip periarfissaq nutaaq nuannaarutigigaa.
Sermitsiaq.AG-mut taama oqarpoq.
- Soorunami angusaq iluarisimaarparput. Suliaq piffissartornarsimaqaaq. Allannguut isumaqarpoq kalaallisut savalimmiutullu oqaaseqarluta filmiliortut, danskisut oqalullutik filmiliortut naligalugit, DFI-mut tapiissutissanik qinnuteqarsinnaaleratta, Klaus Georg Hansen Sermitsiaq.AG-mut oqaluttuarpoq.
