Kalaallit filmiliaat Danmarkimi innersuunneqartoq: Annertuumik nersuiniarneruvoq
Kalaallit nunaanni piviusunik aallaavilinnik filmiliaq Siunissaq - Danmarkimi filminut nersornaasiunneqartartumut Robertimut innersuunneqarpoq.
Filmimi ilitsersuisoq Ivalo Frank innersuunneqarnini tulluussutigeqaa.
- Nuanneqaaq. Assut nuannaarpunga. Tamanna naatsorsuutigisimanngikkaluarpara.
- Robertip nersornaasiuttagaa ilisimavallaanngiilara. Taamaammat innersuunneqarama, nersornaat sorpiaanersoq misissorlugu atuartariaqarsimavara. Nersornaataavoq annertooq, annertuumillu nersuiniarnerulluni, Ivalo Frank KNR-imut oqarpoq.
AAMMA ATUARUK Filmimut tapiissuteqarneq: Kangaatsiami inuusuttut siunissamut annilaammisaarnartuliamik oqaluttuartut
Piviusoq aallaavigalugu filmiliami inuunermut tunngassuteqarpoq. Filmiliami inuusuttut 15-it missaanniittut inuunermi pingaartitaat pillugit ilitsersuisumit apersorneqarput.
Taakku ilagaat avinnikunik angajoqqaalik, taassuma kammalaateqarneq, asanninneq siunissami takorluugai ilaatigut sammineqarput.
- Inuusuttut isaanniit inuuneq qanoq isumaqarnersoq paasiniassallugu pingaarnertut oqaloqatigaakka, Ivalo Frank oqarpoq.
Inuusuttut takorlugai
Filmiliami inuusuttut arlaqartut siunissamik takorluukkaminnik oqaluttuarput.
- Siunissami takorluukkaminnik neriuutiminni, inuunerminnik sorusunnerlutik, nunarsuaq qanoq isumaqarfiginerlugu oqaluttuarput, taanna oqarpoq.
Piviusoq aallaavigalugu filmiliami inuunerup tunngavianut tunngassuteqarneruvoq, taamaakkaluartorli sermersuup aakkiartorneranut attuumassuteqarpoq.
- Silarsuarmioqaataajunnaaratartigata silarsuarmioqataanitta isumalerujussuunera filmilianni aamma ersersinniarsariva.
- Inuuneq aamma isumalerujussuusoq nassuiarniarsarivara, taamaammat uumasut pinngortitarlu filmilianni aamma erseqattaarput kisittami silarsuarmioqataannginnitsinnik eqqaasitsisuusarmata, Ivalo Frank oqarpoq.
Inuuneq ingerlaqqittaraaq
Filmi piviusunik aallaavilik 2018-imi Ivalo Frankip isumassarsiaralugu allaaseralugu aallartippaa.
2019-imi filmiliarilerlugulu.
2021-mi naammassivoq.
AAMMA ATUARUK Ivalo Frankip filmiliaa Chp:Dox-imi takutinneqassaaq
Piviusoq aallaavigalugu filmiliami inuusuttut 15-it missaanniittut peqataapput.
Ivalo Frank filmiliaminut atatillugu marloriarluni nunatsinnukarpoq apersuiartorluni, piffissallu ingerlanerani pissutsit aamma allannguuteqarsimapput.
- Inuusuttut inuuneranni assigiinngitsunik ineriartortoqarpoq, ilai kammagiikkunnaarsimapput, ilai asanninnermut isiginnittariaasiat allanngorsimapput, taamaammat filmilianni aamma ineriartortoqarpoq, taanna oqarpoq.
Filmiliaq Ilulissani Kangaatsiamilu pingaarnertut immiunneqarpoq. Aamma kujataani immiussisoqarpoq.
Nersornaat Robert februaarip sisamaanni tunniunneqassaaq, Ivalo Frank nersornaasiinerup nalaani Danmarkimiittussaanngikkaluarluni, innersuunneqarnini assut nuannaarutigaa.
- Ajugaanissara pivallaanngilara – kisianni pitsaassagaluaqaaq – innersuunneqarnermali filmilioqqinnissannut annertuumik periarfissinneqarpunga.
- Filmiliortaruulluni inuuniarneq ilaatigut unamminartaqaaq, taamaammat taamatut nersorniarneqarneq pingaaruteqaqaaq, Ivalo Frank oqarpoq.
