Filmimut tapiissuteqarneq: Kangaatsiami inuusuttut siunissamut annilaammisaarnartuliamik oqaluttuartut
Kangaatsiamit meeqqat inuusuttullu, Minik Rosing taassumalu Isuani nassaarisaa inuillu nungutinneqaratarsinnaanerat.
Taakku siunissamut annilaammisaarnartuliami killisimanartumi 'Siunissaq - The Last Human'-imi tunngaviupput. Kalaallit piviusulersaarusiassaat nunatsinnit Savalimmiuniillu isiginnaagassiassat pingasut filmilianut aningaasaliissutinit agguagassanit, Norddokimit taperserneqartussat ilagaat.
Ilitsersuisup, Ivalo Frankip suliniummut aningaasatigut tapersiissuteqarneq nuannaarutigingaarlugulu pissangagilaarpaa.
- Filmiliassamut tapiissuteqarfigineqaraanni akisussaaffimmik pilersitsingaatsiartoqarpoq. Aningaasat agguagassat ilaannik tunineqarnera nuannaarutigeqaara. Aningaasammi agguagassat Savalimmiut, nunatta Danmarkillu akornanni paaseqatigiinnerulersitsiniarnermik suliaqarnermut aningaasaliissutaapput, tamannalu pingaaruteqartorujussuusoraara, Ivalo Frank oqarpoq.
Qanoq ingerlava?
Kalaallit Nunaat Savalimmiullu pillugit paasisaqarnerutitsilernissamut 2018-imi aningaasanik immikkoortitsisoqarpoq.
Suliniutit assigiinngitsut tallimat ataatsimut 25 millionit koruuninik aningaasaliiffigineqarput.
KNR-ip ilanngutassiani annikitsuni ataatsimoortuni aningaasat 25 millionit koruunit killiffissiorniarsarai.
Dansk Filminstitutimit, aningaasat agguagassat Norddok 10 millionit koruuninik aningaasartaqarput, taakkulu ilaatigut danskit 2019-imut aningaasanut inatsisaanneersuullutik.
Aningaasat agguagassat katillugit 25 millionit koruninik aningaasartaqarput, taakkulu suliniutinut tallimanut nunarput Savalimmiullu pillugit ilisimasaqarnerulersitsinissamut immikkoortinneqarlutik.
Inuusuttut Kangaatsiameersut siunissaq oqaluttuaraat
Tamanna aamma Ilulissani, Qeqertarsuarami, Aasianni Kangaatsiamilu immiunneqartumi ‘Siunissaq - The Last Human’-imi siunertat ilagaat. Isiginnaagassiami nunatta ilaanit tusagassiuutinit nalinginnaasumik sammineqarneq ajortut takutinneqassapput, Ivalo Frank oqarpoq.
Isiginnaagassiami piffissamut matumunnga, nunarsuup tunngaviusumik qanoq inissisimanera aamma inuuneq toqulu pillugit apeqqutit meeqqat inuusuttullu ilaatigut Kangaatsiameersut aqqutigalugit sammineqarput.
AAMMA ATUARUK Nunatta atuartitsissutiginissaanut aningaasaliissutinit millionit annaaneqartut
Siunissaq - The Last Human
Filmi siunissamut annilaammisaarnartuliaavoq, taannalu piviusulersaarutaallunilu oqaluttualiaavoq. Ilitsersuisup, Ivalo Frankip isiginnaagassiaq akuleriitsitsinerunerarpaa.
Filmi Norddokimit aningaasanik agguagassanit inerisarnerneqarnissamut aamma suliarineqarnissamut tapersiiffigineqarpoq. Filmip aallarnisarneqarnera NAPA-mit Namminersorlutik Oqartussat kulturikkut aningaasaliissutannit aamma Danmarkimi eqqumiitsuliornermik aqutsisoqarfimmit aamma taperneqarnikuuvoq.
Filmi januaarip qaammataani Tromsø International Film Festivalimi North Pitch Awardimik tassa filmiliassamut nutaaliornissamut isumassarsilluarnerpaatut nersornaaserneqarpoq. Awardimillu nersornaaserneqarneq maluginiarneqarluarnissamut pitsaajuaannarpoq.
- Filmip nittarsaannissaanut akuerinnilluarnerujussuuvoq. Oqaluttuamillu kalaallit inuusuttut pillugit oqaluttuarusulluinnarpugut, tamannalu iluatsippoq, taamaammat filmip oqallisigineqarnera ajunngilluinnarpoq, inuillu sunniuteqarluartut ajunngilluinnarnerarpaat, ilitsersuisoq, Ivalo Frank oqarpoq.
- (Meeqqat aaqq.) inuit nungutitaaratarsinnaaneranut inuunerullu pileqqaarnerata oqaluttuarisaanerani qitiullutik inuupput. Taamaammat pisumut aamma inuuneq toqulu pillugit qanoq eqqarsaateqarnerat tusassallugu pingaartorujussuusoraara. Kalaallit qulangiinnarneqarajupput, tamannalu uanga iliuuseqarfiginiarpara.
(Meeqqat inuusuttullu aaqq.) takorluugaat, kissaataat neriuutaallu pillugit aamma taakku silarsuaanni susoqartarnera pillugu oqaloqatigaakka, Ivalo Frank oqarpoq.
2021-mi piareernissaa naatsorsuutaasoq
Nungutinneqaratarsinnaaneq inuunerullu pileqqaarnera Ivalo Frankip eqqartugaa silap pissusiata allanngoriartorneranut sikunut piuneerutsitsiartortumut nunarsuarmilu inuunermut siusinnerpaamut takussutissamut, nassaarineqartumut ilaatigut innersuussuteqarpoq. Isiginnaagassiami professorip, Minik Rosingip Isuani nassaarisani aamma oqaluttuaraa.
AAMMA ATUARUK Nunatsinnut Savalimmiunullu angalanissamut aningaasat immikkoortinneqartut soqutigineqarluartut
Isiginnaagassiap tv-kkut filmertarfissuarnilu takutinneqarnissaa Ivalo Frankip anguniarpaa. Isiginnaagassiallu 2021-p qiteqqunnera naammassinissaa neriuutigalugu.
‘Siunissaq - The Last Human’-ip aningaasannannerata saniatigut savalimmiormiut isiginnaagassiaat marluk ‘Heartist’ aamma ‘Pigen og Sølvdrengen’ naammassineqarnissaannut aningaasanik Norddokimit aamma aningaasaliiffigineqarput.
2019-ip qiteqqunnerani suliniutit arfinillit tassa nunatsinnit pingasut Savalimmiuniillu pingasut inerisaanissamut tapersiiffigineqarput. Suliniutit taakku arfinillit 2019-ip naanerani pingasunngorlutik inerisarneqarnissamut tapersiiffigineqarput.
Isiginnaagassiat pingasut naammassineqarnissaannut tamarmik immikkut 2,4 millionit koruunit sinnilaarlugit tunineqarput.
