Nunatsinnut Savalimmiunullu angalanissamut aningaasat immikkoortinneqartut soqutigineqarluartut
Danmarkimi ilinniarfiit arfineq-pingasut nunatsinnut timmisartumut aappaluttumut imaluunniit Savalimmiunut timmisartumut tungujortumut ilaallutik angalanissaminnut inniminniisimapput.
Ilinniarfiit arfineq-pingasut tamarmik Meeqqanut Ilinniartitaanermullu ministereqarfiup nunatsinnut Savalimmiunullu angalasoqarnissaanut aningaasanik imikkoortitaanit aningaasaliiffigineqarput.
2019-imi aningaasaliissutit 1 millionit koruuniupput, tamannalu annertunerungaatsiarsinnaagaluarpoq. Tassami qinnuteqartut amerlassusaat nalillugu aningaasat annertunerusinnaagaluarput, Ilinniartitaanermut Pitsaassutsimullu Aqutsisoqarfik KNR-imut mailikkut allappoq.
- Angalanissamut taperneqarnissamut qinnutigineqartut katillugit 8,5 mio. koruuniupput, missingersuutitulli 2019-imi aningaasaliissutaasut 1 mio. koruuniullutik, aqutsisoqarfik allappoq.
Ilinniarfiit arfineq-pingasut toqqarneqartut
Angalanissamut qinnuteqartut katillugit 49-pput, taakkunanngalu arfineq-pingasut kalaallit savalimmiormiullu kulturiannik pinngortitaanillu qanimut takunninnissaminnut qilarnaaruteqarsinnaapput.
Aningaasat 10 millionit koruunit angalanissamut 2019-imit 2022-mut immikkoortinneqarput. Ukioq manna ukiullu tulliini marlunni aningaasat 3 millionit koruuniupput, siornalu soqutiginnittoqarnera tunngavigalugu aningaasat agguaanneqarluarnissaat STUK-ip qularinngilaa.
Qanoq ingerlava?
Kalaallit Nunaat Savalimmiullu pillugit paasisaqarnerutitsilernissamut 2018-imi aningaasanik immikkoortitsisoqarpoq.
Suliniutit assigiinngitsut tallimat ataatsimut 25 millionit koruuninik aningaasaliiffigineqarput.
Aningaasat atorneqarfissaannut atorneqarpat?
KNR-ip ilanngutassiani annikitsuni ataatsimoortuni aningaasat 25 millionit koruunit killiffissiorniarsarai.
- 2020-imut aningaasaliissutinut itigartitsissuteqarnerit aamma 2019-imi piumasaqaatit malillugit atuarfiit qinnuteqarnissaminnut angumersisinnaanatik 2020-milu angalasinnaannginnerminnik ilisimatitsinerat pissutigalugu suli qinnuteqartoqarnerunissaa naatsorsuutigaarput.
IA: Naapitsineq paasisaqartitsisarpoq
Nunatsinni folketingimut ilaasortat angalanissamut aningaasaliissutit soqutigineqarluarnerat nuannaarutigaat.
- Ajunngilluinnarpoq. Inuit akornanni naapinneq atuakkatigut atuakkanit sunniuteqarnerungaatsiarsinnaavoq. Kalaallit inuusuttut naapinneratigut siammasinnerusumik assigiinngisitaarnerusumillu paasisaqartoqarsinnaavoq, Aaja Chemnitz Larsen (IA) oqarpoq.
- Neriunaateqarpoq, amerlanerusullu suli nunatsinnut angalanissaat neriuutigaara. Tamanna ajunngiinnarsinnaasoraara. Tamanna nakkutiginiarpara. Ministereqarfik aningaasanut inatsisissami pitsanngorsagassartaqarnersoq pillugu attaveqarfiginiarpara, Aki-Matilda Høegh-Dam (S) oqarpoq.
