Filmi "Nuummioq" aqagu takuteqqaarneqassaaq

Filmi ukiuni pingasut ingerlaneranni piviusunngoriartuaarpoq, Otto Rosingilu Torben Bechilu ilitsersuisuullutik. Filmimi inuttat pingaarnersaat tassaapput sanasoq Malik, Lars Rosing isiginnaartitsisoralugu, Nivi, Julie Berthelsen isiginnaartitsisoralugu, kiisalu Maliup ikinngutiginerpaasaa illuusaalu Mikael, Angunnguaq Larsen isiginnaartitsisoralugu.

Angunnguaq Larsen nipilersortartutut ilisimaneqarneruvoq, rockertartuni Chilly Fridayikkunni guitarertartuulluni.

Taanna ullumi Qaqortumiippoq, Boney M-ikkut tusarnaartitsinissaannut erinarsortartoq Dida peqatigalugu kissassiissagamik.

Filmip pingaarnertut oqariartuutai pillugit Angunnguaq Larsen ima oqarpoq:

- Isumakkeerinnissinnaaneq, pissutsillu tamaanerannik akuerinnissinnaaneq filmimi oqariartuutigineqartut isumaqarpunga, Angunnguaq Larsen oqarpoq, nangillunilu:

- Filmimut peqataalluni assut nuannerpoq. Ilitsersuisut takorluugaat piviusunngortinniarlugu assut nuannerami. Silarsuaq taamaattoq iserfigalugu nuanneqaaq, oqaluttuaq uummarsartutullusooq illugu. Ilikkagaqarfigaara, Angunnguaq Larsen oqarpoq.

Angunnguaq Larsen, Nuummiumi peqataasoq taama oqarpoq. Filmi pisortatigoortumik aqagu takutinneqaqqaassaaq, inunnullu tamanut sapaatiuppamiit takuneqarsinnaalissalluni.

"Nuummioq" Sisimiuni Ilulissanilu kingusinnerusukkut takutinneqarumaarpoq.