Filmfestivalertoqarnissaanut pilersaarutit saqqummiunneqarput
Nuuk International Filmfestivalimi pilersaarutit arfininngornermi saqqummiunneqarput, innuttaasullu pisussarpassuarnut qilanaarutissaqartut, festivalimik aaqqissuisut oqaatigaat.
Nuummi septembarip ulluisa 19-iannit 22-ata tungaanut Nuuk International Filmfestivalertoqassaaq, filmit isiginnaariarneqarsinnaassallutik, oqallitsitsinernullu peqataasoqarsinnaassalluni. Kalaallit filmiliaannik isiginnaartoqarsinnaassasoq, Karsten Heilmann, FILM.gl-imeersoq, filmfestivalimillu aaqqissueqataasoq oqarpoq:
- Nunatsinni Danmarkimilu angerlarsimaffeqanngitsut pillugit Hanne Sørensenip piviusulersaarusiaa takutinneqassaaq, immikkullu taasinnaavara Pipaluk K. Jørgensenip filmiliaa "Anori", immikkut takuteqqaarneqartussaq. Arfininngornermi taanna takutittussaassavarput, taava filmit naatsut ataasiakkaat oqaluttualiat, taavalu aamma piviusulersaarutit naatsunnguit peqataatippavut, Karsten Heilmann, FILM.gl-imeersoq, taama oqarpoq.
Filmiliat Issittumeersut takutinneqartussanut ilaasut tassaapput Sibiriamiut filmiliaat nersualaarneqartoq Ága, Nunavummiillu filmiliat arlallit, soorlu aamma Alanis Obomsawinip piviusulersaarutaa "Our people will be healed" takutinneqassasoq:
- Alanis Obomsawin, Canadami Abenaki indianerineersuuvoq, 85-inik ukioqarluni. Taassuma piviusulersaarutit 50-init amerlanerusut filmiliarisimavai. Naapinnissaanut pissangarrappugut. Ukiorpassuit tusaamallugu, siullerpaamik nunatsinniinnissaanut takunissaa qilanaaraarput, Karsten Heilmann oqarpoq.
AAMMA ATUARUK Grønland sætter sig i spidsen for ny arktisk filmfond
Piviusulersaarusiortoq ilisimaneqarluartoq Nuummukassaaq
Alanis Obomsawin tassa peqataasussanngorpoq, filmilianilli isiginnaariartoqarsinnaanerup saniatigut Nuuk International Filmfestivalimi oqallitsitsisoqartassaaq, utoqqasaanngortorlu Obomsawin imminut ilisaritiitigaluni filmiliani pillugit oqalugiassalluni.
AAMMA ATUARUK Issittormiut filmiliornermut aningaasaateqarfiliortut
Filmfestivali immikkut qulequtaqartinneqanngilaq. FILM.gl-ili Issittumi nunap inoqqaavisa filmilianut aningaasaateqarfiannik, Arctic Indigenous Film Fundimik, AIFF-imik, pilersitseqataavoq, ukioq mannalu filmfestivali tassunga atasumik aaqissugaavoq.
Kikkummi festivalertoqarneranut peqataassanersut aaqqissuisut oqallisigigamikku Issittumit kikkut peqataasinnaanersut eqqartorpaat.
AAMMA ATUARUK Grønland markerer sig på Filmfestival i USA
Meeqqat aamma peqataatinneqassapput
Nuuk International Filmfestivalilu inersimasunuinnaq samminngilaq, meeqqat aamma eqqarsaatigineqarsimapput:.
- Taqqut Productionsip, Nunavummi Iqalunneersup, filmerpaalunnik pajukkamisigut meeqqanoortunik. Maluginiarpara suliaat tassaanerusartut filmiliat titartakkat, inuusalianillu aalasartunik naatsunik aamma filmiliortarlutik. Filmit katillugit arfinillit pingasukkaarlugit ullut tulleriit takutissavavut, Islandimiullu meeqqanut filmiliaat, aamma titartagaq, takutissallutigu, Karsten Heilmann oqarpoq.