Kalaallit pillugit filmiliat Amerikami soqutigineqarluartut

Nunarsuarmi katersugaasivinni annerpaami, The Smithsonian Institutimi, Greenland Eyes Festivalertoqarpoq.

Arctic Spring Festivali amerikkarmiut upernaakkut pikialaarutigisarpaat.

Greenland Eyes Festivalimut aaqqissuisoq, Ivalo Frank peqataavoq, filmfestivalertoqarnera Nunatta nunarsuarmioqataalernissaminut periarfissarilluaraa isumaqarpoq. Isiginnaariallu soqutiginnilluarneri assut nuannaarutigeqaa.

- Kalaallit Nunaanut soqutiginnittut nunani assigiinngitsuniit Washingtonimi ataatsimoorput, inuppassuillu ukiorpassuarni imminnut nalunnginnikut takorniorput, oqarsinnaalluarpungalu inunnik ulikkaavippoq, Ivalo Frank oqarpoq.

Danskit aallartitaqarfiani filminik takutitsinermi, nunanit tamalaaneersut 4800-it missaat soqutiginnillutik arfininngormat isiginnaariarput.

Filmillu takutinneqareernerini apeqqutilleerusuttut apersornissaannik aaqqissuisut periarfissittarsimavaat.

Kalaallit oqaluttuarisaanerat nunattalu pissusaa kulturialu paasititsiniutigineqarput oqalugiarnertalinnik aammalu filmiliat atorlugit nunasiaataasimanermi pissutsit takutinneqarlutik.

Kalaallit Nunaat inuilu pillugit apeqquterpassuaqarput, taamatullu kalaallit nunasiaataasimanerminnut qanoq eqqorneqaatigisimaneraat paasiniarlugu apersortoqangaatsiartoq, Ivalo Frankip ilanngullugu oqaatigaa.

Sumékkut nuannarilluarpaat

Sume Mumisitsinerup Nipaa aamma Inuk Silis Høeghimit filminngortinneqartoq, katersugaasivissuarmi takutinneqartoq soqutigineqarluavissimavoq, Sumekkullu nipilersornerat nuannarilluarsimavaat.

Jakob Maqe, Aka Hansen, Marc Fussing Rosbach, Ulannaq Ingemann, Knud KP Petersen aammalu Inuk Silis Høegh Filmfestivalimi filmeeqqanik takutitsisuupput.

Nunatta oqaluttuarisaanera filminngorlugu takutinneqarnerani, kalaallinik takuniaarusuttut amerlisimasut Ivalo Frankip nassuiarpaa, taamatullu filmeeqqat filmillu tigulluarneqarsimallutik.

- Apeqquterpassuaqarput soqutiginnittupilussuullutillu. Kalaallit Nunaannut issittumullu nunarsuarmioqataasunit soqutiginnilluartoqartoq takutinneqaqqiinnarpoq, taamaammat nuannaaqaagut, Greenland Eyes Festivalimut aaqqissuisoq, Ivalo Frank oqarpoq.

Uummannami Meeqqat angerlarsimaffianeersut meeqqat takutitsisunut ilaapput, ullumikkullu Los Angelsesimut ingerlaqqipput.